މި ސަރުކާރަށް އަހަރެއް ފުރެން ކައިރިވެފައިވާއިރު، ޕްރޮޖެކްޓެއް ނުހިނގާ ކަމަށާއި އުޅެނީ ވައްކަން ކުރަން ކަމަށް އެމްޑީޕީގެ ޕާލަމެންޓްރީ ގްރޫޕްގެ ލީޑަރު، ހިތަދޫ ދެކުނު ދާއިރާގެ މެމްބަރު އިބްރާހިމް ނާޒިލް ވިދާޅުވެއްޖެ އެވެ.
އެމްޑީޕީގެ ހަރުގެ ޖަލްސާގައި ރޭ ވާހަކަދައްކަމުން ނާޒިލް ވިދާޅުވީ މި ސަރުކާރަށް އެއް އަހަރު ފުރެން ދާއިރު ޕްރޮޖެކްޓެއް ނުހިނގާ ކަމަށާއި ރިޔާސީ އިންތިހާބު ނިމުމާއެކު އޭރު ކުންފުނިތަކަށް ސިޓީ ފޮނުވައިގެން މަސައްކަތްތައް ހުއްޓުވީ ތިމަންނާމެން ވެރިކަމަށް އައިސް އެ މަސައްކަތްތައް ކުރާނެ ކަމަށް ބުނެ ކަމަށެވެ. ނަމަވެސް މި ސަރުކާރަށް އޭގެއިން އެއްވެސް ކަމެއް ނުކުރެވޭ ކަމަށާއި ކަންކަން ނުކުރެވުނީ އިހުލާސްތެރި ކަމެއް ނެތުމުން ކަމަށް ނާޒިލް ވިދާޅުވި އެވެ.
"ބޭނުމެއް ނުވޭ ރައްޔިތުންގެ ކަންކަން ކޮށްދޭކަށް. ބޭނުންވަނީ މުޅިން އެހެން ކަންތައްތަކެއް ކުރަން. ވައްކަން ކުރަން ބޭނުންވަނީ. އެކަން ކުރާނެ ވަރަށް ބާރަށް،" ނާޒިލް ވިދާޅުވި އެވެ.
މި ސަރުކާރުން ކައިރިކޮށްގެން އުޅެނީ ވެސް ވައްކަން ކުރަން ބޭނުންވާ މީހުން ކަމަށާއި ހަގީގަތުގައި ކަންކަން މަގުފަހިކުރަނީ ވެސް އެކަން ކުރުމަށް ކަމަށް ނާޒިލް ވިދާޅުވި އެވެ. އަދި މި ސަރުކާރަށް އިންޑިއާ ނޫން އެހެން ގައުމެއްގެ އަތުން އެއްޗެއް ވެސް ނުލިބޭނެ ކަމަށާއި ސަރުކާރުން މިހާރު އިންޑިއާއާއެކު އިތުރު އެއްބަސްވުންތަކެއް ހަދަން ބޭނުންވާ ކަމަށްވެސް ނާޒިލް ވިދާޅުވި އެވެ.
"އެ ނޫން އެހެން ގޮތެއް ނެތޭ. ނުލިބޭނެ އެހެން ތަނަކުން އެއްޗެއް. ލިބެން އޮތީ އިންޑިއާ އިން،" އޭނާ ވިދާޅުވި އެވެ.