ދުނިޔޭގެ މަޝްހޫރު ކައްކާ ޝޯ ފްރެންޗައިޒް "މާސްޓަޝެފް" ގެ ރާއްޖޭގެ ވާޝަން ބާއްވަން ތައްޔާރުވަމުން އަންނަ ކަމަށް ޓޫރިޒަމް މިނިސްޓަރު އިބްރާހީމް ފައިސަލް ވިދާޅުވެއްޖެ އެވެ.
އިއްޔެ ބޭއްވި ނޫސް ކޮންފަރެންސެއްގައި މިނިސްޓަރު ވިދާޅުވީ "މާސްޓަޝެޕް މޯލްޑިވްސް" ބޭއްވުމުގެ އެންމެ މުހިންމު މަގުސަދަކީ ދިވެހިން ކެއްކުމުގެ ދާއިރާއަށް ޝައުގުވެރިކޮށް، ދިވެހި ޝެފުން އުފެއްދުުން ކަމަމަށެވެ. އަދި މީގެ ސަބަބުން ރާއްޖޭގެ ރިސޯޓްތަކުގެ އެންމެ މަތީ ފަންތީގެ ޝެފުންގެ ގޮތުގައި މަސަައްކަތް ކުރުމުގެ ފުރުސަތު ފަހިވާނެ ކަމަށް މިނިސްޓަރު ވިދާޅުވި އެވެ.
"މާސްޓަޝެފް މޯލްޑިވްސް" ފަށަން ތައްޔާރުވަމުން އަންނަ ވާހަކަ ފައިސަލް އިއްޔެ ވިދާޅުވި އިރު، އެ ޝޯ ރާއްޖޭގައި ބާއްވަން ދައުލަތުގެ މީޑިއާ، ޕީއެސްއެމުން ނިންމައި ޖެނުއަރީ 18، 2020 ގައި އެ ލޯންޗްކުރި އެވެ. އޭރު ނިންމީ އެ އަހަރުގެ ސެޕްޓެމްބަރު މަހުގެ ތެރޭގައި ޝޯ ފަށާށެވެ. އަދި އޭރު "މާސްޓަޝެފް މޯލްޑިވްސް" ގެ ޓައިޓްލް ސްޕޮންސަރަކީ ދިރާގެވެ. އޭގެ އިތުރުން އެސްޓީއޯ، ވިލާ ކޮލެޖް އަދި ބޭންކް އޮފް މޯލްޑިވްސް (ބީއެމްއެލް) ކޯ-ސްޕޮންސަރުންގެ ގޮތުގައި ސޮއިކުރި އެވެ.
ނަމަވެސް ފަހުން އެކަން ހުއްޓި، ފަހުން ޕީއެސްއެމުން "މާސްޓަޝެފް މޯލްޑިިވްސް" ގެ އެއްވެސް ވާހަކައެއް ނުދައްކަ އެވެ.
މިނިސްޓަރު ފައިސަލް ވިދާޅުވީ އެ ޝޯ ގެނެސް ދޭން މިހާރު ކުރަމުން އަންނަ މަސައްކަތުގެ ތެރެއިން
ޕީއެސްއެމް އެކީގައި ވަރަށް އަވަހަށް މަޝްވަރާތަކެއް ކުރާނެ ކަމަށެވެ.
"މިކަމާ ގުޅޭ ގޮތުން ބައެއް ރިސޯޓުތަކުގެ އިންވެސްޓަރުންނަށް ތިބި ބޭފުޅުންނާއި މަޝްވަރާކުރެވިފައިވާނީ. ބައެއް ބޭފުޅުން އެބަ ވިދާޅުވޭ މިކަމުގައި ވަރަށް ބޮޑަށް އެހީ ދެއްވާނެ ކަމަށް،" ފައިސަލް ވިދާޅުވި އެވެ. "މިސާލަކަށް ރިސޯޓެއްގައި އެކަން ކުރަން ބޭނުންވާ ނަމަ ކުރެވޭ ގޮތަށް. އޭރުން ވަރަށް ބޮޑަށް މީގެ އިންޓްރަސްޓް އުފެއްދޭނެ."