އުރީދޫ "މަސް ރޭސް" މިއަދު ފަށަނީ

އުރީދޫ މޯލްޑިވްސްގެ މި އަހަރުގެ "މަސް ރޭސް" މިއަދު ފަށަން ތައްޔާރުވެއްޖެ އެވެ.

މި މުބާރާތް ފަށަން ހަމަޖެހިފައި ވަނީ ކ. ހިންމަފުށީގައި މެންދުރު ފަހު 2:00 ގަ އެވެ. މިރޭ 9:00 އާ ހަމައަށް ކުރިއަށް ގެންދާ "މަސް ރޭހު" ގައި ހިންމަފުށިން 21 ޓީމު ބައިވެރިވެ އެވެ.

މި މުބާރާތުގެ އެއް ވަނަ ޓީމަށް ހުށަހަޅާފައި ވަނީ 25،000ރ. އެވެ. އަދި ދެ ވަނަ އަށް 10،000ރ. ހުށަހަޅާފައިވާ އިރު، ތިން ހުށަހަޅާފައި ވަނީ 5،000ރ. އެވެ. މީގެ އިތުރުން އެންމެ މޮޅު މަސްވެރިޔާއަށް 1،000ރ. ހުށަހަޅާފައިވާ އިރު އެންމެ މޮޅު އަންހެން މަސްވެރިޔާ އަށް ވެސް 1،000ރ. ވަނީ ހުށަހަޅައިފަ އެވެ.

އެންމެ މޮޅު މަސްވެރިޔާ އާއި އަންހެން މަސްވެރިޔާ އަށް ޕިއޯ އަލްޓިމެޓްސީ ސްޕިރިޓް/ގޭންގްސްޓަ (އެޗް/ޑީ) ދޮއްޓެއް ވެސް ވަނީ އިނާމަކަށް ހުށަހަޅާފައިވެ އެވެ.

ތިން ރަށެއްގައި މި އަހަރު މި މުބާރާތް ބާއްވާ އިރު، ކޮންމެ ރަށަކުން ވެސް ވަކިވަކިން ވަނަތައް ހޮވާނެ އެވެ. މުބާރާތުގެ ކުރިއަށް އޮތް ދެ ރޭސް އޮންނާނީ ޅ. ނައިފަރު އަދި ގދ. ތިނަދޫގަ އެވެ. ނައިފަރުގައި މުބާރާތް އޮންނާނީ މި މަހުގެ 16 ވަނަ ދުވަހު އެވެ. އަދި ތިނަދޫގައި 23 ވަނަ ދުވަހު އެވެ.

އުރީދޫ "މަސް ރޭސް" އަކީ އެ ކުންފުނީގެ އަހަރީ ދުވަހާ ގުޅުވައިގެން ކޮންމެ އަހަރަކު ވެސް ބާއްވަމުން އަންނަ ކާމިޔާބޔު މުބާރާތެކެވެ. މިއީ އުރީދޫ މޯލްޑިވްސްގެ 19 ވަނަ އަހަރެވެ.