ޝޫޓިން ފަށަން ތައްޔާރީތައްވަމުން އަންނަ ޝާހްރުކް ޚާނާއި ދަރިފުޅު ސުހާނާ ޚާންގެ އެކްޝަން ތުރިލާ "ދަ ކިންގް" ގެ ކާސްޓަށް އަބޭ ވަރުމާ ވެސް ނަގާފައިވާ ކަމަށް ރިޕޯޓްތައް ބުނެފި އެވެ.
އޭނަ އަކީ ދާދި ފަހުން ރިލީޒްކޮށް، ބޮކްސް އޮފީހުގައި ބޮޑު ކާމިޔާބީއެއް ހޯދި ހޮރޯ-ކޮމެޑީ "މުންޖިއާ" ގެ ބަތަލެވެ. ބައެއް މީޑިއާތަކުން ބުނީ "ކިންގް" ގައި އަބޭ ފެންނާނެ ކަމަށް ބެލެވެނީ ސުހާނާ ލަވް އިންޓްރަސްޓްގެ ގޮތުގަ އެވެ.
މި ފިލްމަކީ ސުހާނާގެ ދެވަނަ ފިލްމެވެ. އޭނަގެ ފުރަތަމަ ފިލްމަކީ މިދިޔަ އަހަރުގެ "ދި އާޗީސް" އެވެ.
"ކިންގް" ގެ ވާހަކަ ދެކެވޭތާ މިހާރު އެތައް ދުވަހެއްވެފައިވާ އިރު، ފިލްމު ރަސްމީކޮށް އިއުލާންކޮށްފައި ނުވާތީ މިއާ ބެހޭ މާ ބޮޑު ކަށަވަރު މައުލޫމާތުތަކެއް އަދި ނުލިބެ އެވެ. ރިޕޯޓްތައް ބުނާ ގޮތުން މީގެ ވިލަން އަކީ އަބީޝެކް ބައްޗަނެވެ.
"ކިންގް" އަކީ ޝާހްރުކްގެ ފިލްމު ކުންފުނި ރެޑް ޗިލީސް އެންޓަޓައިންމަންޓާއި އޭނަގެ މިދިޔަ އަހަރުގެ "ޕަތާން" ގެ ޑައިރެކްޓަރު ސިދާތު އާނަންދުގެ މާފްލިކްސް ޕިކްޗާސް ގުޅިގެން ހަދަން ހަމަޖެހިފައިވާ ފިލްމެކެވެ. ފިލްމުގެ ޑައިރެކްޓަރަކީ ސުޖޯއި ގޯޝް އެވެ.