ބިދޭސީއެއްގެ ވޮލެޓް ދަމައިގަތް ދެ މީހަކު ހައްޔަރުކޮށްފި އެވެ.
ފުލުހުން މިއަދު ބުނ ހެނދުނު 09:40 ހާއިރު ހެންވޭރު ޕޮލިސް ސްޓޭޝަނުގެ ފުލުހުން ޕެޓްރޯލް ކުރަމުން ދިޔަ އިރު، ސޯސަން މަގުން ސައިކަލެއްގައި ދިޔަ ބަޔަކު ބިދޭސީއެއްގެ ވޮލެޓް ފޭރިގެން ދިޔަކަމުގެ މައުލޫމާތު ލިބިގެން ދެ މީހަކު ހައްޔަރުކޮށްފައިވާ ކަމަށެވެ.
އެގޮތުން ސައިކަލުގެ ފަހަތުން ގޮސް އަތުލައިގަތް ދެ މީހުންނަކީ އައްޑޫ މަރަދޫ ސަލްޓަންވިލާ، މުހައްމަދު ރިމާހު، 31، އާއި ހަމަ އެ ގޭ އިބްރާހިމް ޝުޖާއު، 39، އެވެ.
ފުލުހުން ބުނީ އެ މީހުން ހައްޔަރުކޮށް ފައިސާއާ އެކީ ވޮލެޓް ހޯދައި ވެރިފަރާތާ ހަވާލުކޮށްފައިވާ ކަމަށެވެ.
މި މައްސަލަ މިހާރު އަންނަނީ އިތުރަށް ތަހުގީގު ކުރަމުންނެވެ.