ރާއްޖެ އާއި އިންޑިއާގެ މެދުގައި އޮތް ޒަމާންވީ އެކުވެރިކަމުގެ ގުޅުން ދަމަހައްޓާނެ ކަމަށް ފޮރިން މިނިސްޓަރު މޫސާ ޒަމީރު ވިދާޅުވެއްޖެ އެވެ.
ޒަމީރު މިހެން ވިދާޅުވީ، އިންޑިއާގެ މިނިސްޓަރ އޮފް އެކްސްޓަރނަލް އެފެއާޒް ޑރ. އެސް. ޖައިޝަންކަރު މިއަދު ހަވީރު ރާއްޖެ ވަޑައިގަތުމާ ގުޅިގެންނެވެ. ޖައިޝަންކަރު މިރޭ ވަނީ ފޮރިން މިނިސްޓްރީ އަށް ޒިޔާރަތް ކުރައްވާފަ އެވެ.
ޒަމީރު "އެކްސް"ގައި ކުރެއްވި ޕޯސްޓެއްގައި ވިދާޅުވީ އެކި ދާއިރާތަކުން ދެ ގައުމު ގުޅިގެން ކުރިއަށް ދިޔުމާ ގުޅޭގޮތުން ޖައިޝަންކަރުގެ މި ދަތުރުގެ ތެރެއިން މަޝްވަރާތައް ކުރައްވާނެ ކަމަށެވެ.
އަދި ރާއްޖެ އިން އޮތީ ދެ ގައުމުގެ ގުޅުން ވަރުގަދަކޮށް، ގުޅިގެން އެކުވެރިކަމާ އެކު ކުރިއަށް ދިއުމުގެ އަޒުމުގައި ކަމަށްވެސް ޒަމީރު ވިދާޅުވި އެވެ.
Pleased to welcome External Affairs Minister @DrSJaishankar to the Ministry of Foreign Affairs this evening.
We will be continuing our discussions on all areas of our bilateral cooperation, reinforcing our shared commitment to deepening our partnership.
We are committed to… pic.twitter.com/G0E5DRCb04
— Moosa Zameer (@MoosaZameer) August 9, 2024
ތިން ދުވަހަށް ޖައިޝަންކަރު ކުރައްވާ ދަތުރުފުޅުގައި ރައީސް ޑރ. މުހައްމަދު މުއިއްޒާއި މިނިސްޓަރު ޒަމީރާއި ބައްދަލުކުރައްވައި ރަސްމީ ވާހަކަތައް ބާއްވާނެ އެވެ.
ޖައިޝަންކަރުގެ މި ދަތުރުފުޅުގެ ތެރެއިން އައްޑޫ ސިޓީ އަށް ވެސް ވަޑައިގަތުމަށް ވަނީ ހަމަޖެހިފަ އެވެ. އެގޮތުން އިންޑިއާގެ އެހީގައި މާލެ އާއި އައްޑޫގައި ކުރިއަށްގެންދާ މަޝްރޫއުތަކުގެ އެންމެފަހުގެ މަސައްކަތްތައް ޖައިޝަންކަރު ބައްލަވާލެއްވުމަށް ވަނީ ހަމަޖެހިފަ އެވެ.