މިދިޔަ ބުދަ ދުވަހުގެ ރެެއިން ފެށިގެން އޮލިމްޕަހުގައި ދައްކަމުން އަންނަ ފިލްމު "ސާޔާ" އަތޮޅުތެރޭގެ ރަށްރަށުގައި ވެސް އަޅުވަން ތައްޔާރުވާން ފަށައިފި އެވެ.
އެގޮތުން މި ފިލްމު އެންމެ ފުރަތަމަ އަޅުވަން ހަމަޖެހިވާ ދެ ދެ ރަށަކީ ކުޅުދުއްފުއްޓާއި އދ. ދަނގެއްޗެވެ. އެ ދެ ރަށުގައި މި މަހުގެ 15 ވަނަ ދުވަހުގެ އަޅުވާ ޝޯތަކަށް މިހާރު އަންނަނީ ޓިކެޓް ވެސް ވިއްކަމުންނެވެ.
"ސާޔާ" އަކީ މަޝްހޫރު އެކްޓަރު ޔޫސުފް ޝަފީއު (ޔޫއްޕެ) ލިޔެ، ޑައިރެކްޓްކޮށް މުހިއްމު ރޯލެއް ވެސް ކުޅެފައިވާ ލޯބީގެ ބިރުވެރި ފިލްމެކެވެ. މީގެ ލީޑް ކާސްޓްގައި ދެން ހިމެނެނީ އައިމިނަތު ރަޝްފާ (އާޝާ) ގެ އިތުރުން އިބްރާހީމް ޖިހާދު (ޖިމީ) އެވެ.
އިތުރު ކާސްޓުންގެ ތެރޭގައި އަހުމަދު ނިމާލު އަދި މުހައްމަދު މަނިކު ފަދަ ފަންނާނުން ވެސް ހިމެނެ އެވެ.
"ސާޔާ" އަކީ ފަޅުރަށަކަށް ހަނީމޫނަށްދާ ދެމަފިރިއަކަށް ކުރިމަތިލާން ޖެހޭ ބިރުވެރި ހާދިސާތަކެއް ދައްކުވައި ދޭނެ ފިލްމެކެވެ. މީގެ ޝޯތައް އޮލިމްޕަހުގައި މި މަހުގެ 24 އާ ހަމައަށް ކުރިއަށް ގެންދާނެ އެވެ.
"ސާޔާ" އަކީ ޔޫއްޕެ ޕްރޮޑަކްޝަނާއި ޕްރޮޑިއުސަރު އިސްމާއީލް ޝަފީގުގެ ޝައި ޕްރޮޑަކްޝަން ގުޅިގެން ގެނެސްދިން ފިލްމެކެވެ. އެ ޓީމުން ބުނީ ފިލްމު އަޅުވަން އެދޭ ހުރިހާ ރަށަކަށް އެ ފުރުސަތު އޮންނާނެ ކަމަށެވެ.