އިންޑިއާގެ އެހީގައި ރާއްޖޭގައި ހިންގި 6 މަޝްރޫޢެއްގެ ނިމުން ފާހަގަކޮށް ފިއެވެ.
އެ މަޝްރޫޢުތަކުގެ ނިންމުން ފާހަގަކޮށްފައި ވަނީ އިންޑިއާގެ އެކްސްޓާނަލް އެފެއާޒް މިނިސްޓަރު ޑރ. ސުބްރަމަނިއަމް ޖައިޝަންކަރު އިއްޔެ ރާއްޖެ ފެއްޓެވި ދަތުތުގެ ތެރެއިން ރޭ ބޭއްވި ރަސްމިއްޔާތެއްގަ އެވެ.
ރޭ ނިމުން ފާހަގަކުރީ އިންޑިއާގެ އެގްޒިމް ބޭންކުގެ ލައިން އޮފް ކްރެޑިޓް (އެލްއޯސީ) ގެ ދަށުން ކުރިއަށް ގެންދިޔަ މަޝްރޫޢުތަކެކެވެ.
އޭގެ ތެރޭގައި ހިމެނެނީ:
* ހއ. އަތޮޅު ތައުލީމީ މަރުކަޒުގައި ގާއިމުކުރި އިންކްލޫސިވް އެޑިއުކޭޝަން ސަޕޯޓް ޔުނިޓް
* ކުޅުދުއްފުށި ރީޖަނަލް ހޮސްޕިޓަލުގައި ގާއިމުކުރި ޗައިލްޑް ޑިވެލޮޕްމަންޓް ސެންޓަރު
* ތިނަދޫ އަބޫބަކުރު ސްކޫލްގައި ގާއިމުކުރި އިންކްލޫސިވް އެޑިއުކޭޝަން ސަޕޯޓް ޔުނިޓް
* ލ. އިހައްދޫ ސްކޫލްގައި ގާއިމުކުރި އިންކްލޫސިވް އެޑިއުކޭޝަން ސަޕޯޓް ޔުނިޓް
* ތ. ތިމަރަފުށި، ތ. ވޭމަންޑޫ އަދި ގއ. ކޮނޑޭގައި ކުރިއަށްގެން ދިޔަ މަގުބައްތި ހަރުކުރުމުގެ މަޝްރޫއު
* ރ. އުނގޫފާރު ރީޖަނަލް ހޮސްޕިޓަލުގައި ގާއިމުކުރި މެންޓަލް ހެލްތު ޔުނިޓު
އިންޑިއާގެ އެހީގައި ރާއްޖޭގައި އަންނަނީ ގިނަ މަޝްރޫއުތަކެއް މިހާރު ވެސް ހިންގަމުންނެވެ. އޭގެ ތެރޭގައި ވަރަށް ބޮޑެތި ޕްރޮޖެކްޓްތަކެއް ވެސް ހިމެނެ އެވެ. އެގޮތުން ތިލަމާލެ ބްރިޖާއި އައްޑޫގެ މަގުތައް ހެދުމަކީ އިންޑިއާގެ އެހީގައި ކުރިއަށް ގެންދާ ބޮޑެތި މަޝްރޫއުތަކެކެވެ.
ޖެއިޝަންކަރުގެ ދަތުރުގެ ތެރެއިން އައްޑު އަށް ވެސް ވަޑައިގަންނަވާ ގޮތަށް ހަމަޖެހިފައިވެ އެވެ.