މިދިޔަ ހަފުތާގެ ތެރޭގައި އިސްތިއުފާ ދެއްވައި ގައުމުން ފިއްލެވި ބަންގްލަދޭޝްގެ ކުރީގެ ބޮޑުވަޒީރު ޝޭހް ހަސީނާ އަލުން އެނބުރި ގައުމަށް ވަޑައުގަންނަވާނެ ކަމަށް އޭނަގެ އާއިލާ އިން ބުނެފި އެވެ.
ހަސީނާ ފިއްލަވައިގެން ވަޑައިގެންނެވީ އިންޑިއާއަށެވެ.
އެމެރިކާގައި ދިރިއުޅުއްވަމުން ގެންދަވާ ހަސީނާގެ ދަރިކަލުން ސަޖީބް ވާޒެދު ޖޯއި ޓައިމްސް އޮފް އިންޑިއާ އަށް ދެއްވި އިންޓަވިއުއެއްގައި ވިދާޅުވީ މިހާރު އުފައްދާފައިވާ ވަގުތީ ސަރުކާރުން އާންމު އިންތިހާބަކަށް އިއުލާން ކުރާ ހިސާބުން ހަސީނާ އެނބުރި ގައުމަށް ވަޑައިގަންނަވާނެ ކަމަށެވެ.
"މަންމަ ކުރިން ނިންމަވައިގެން ހުންނެވީ މި ދައުރަށް ފަހު ސިޔާސީ ދާއިރާ އިން ރިޓަޔާ ވެސް ކުރައްވަން." ސަޖީބު ވިދާޅުވި އެވެ.
ހަސީނާ އިސްތިއުފާ ދެއްވައި ގައުމުން ފިއްލެވީ ސަރުކާރާ ދެކޮޅަށް އެތައް ހާސް ބަޔަކު މަގުތަކަށް މިދިޔަ މަހުގެ ތެރޭގައި ނިކުމެ، ބޮޑެތި މުޒާހަރާތަކެއް ފަށައި، ގައުމުގެ ހާލަތު ވަރަށް ބޮޑަށް ގޯސްވެފައި ވަނިކޮށެވެ. ސަރުކާރާ ދެކޮޅަށް ގިނަ ބަޔަކަށް ނުކުންނަން މަޖުބޫރުވި ސަރުކާރުގެ ވަޒީފާތަކުގެ ކޯޓާގެ މައްސަލައިގަ އެވެ.
މިކަމާ ގުޅިގެން އުފެދުނު މުޒާހަރާތަކުގައި ބޮޑެތި ހަމަނުޖެހުންތަކެއް ވެސް ހިނގައިގެން ގޮސްފައިވާ އިރު، 300 އެއްހާ މީހުން މަރު ވެސް ވެފައިވެ އެވެ.
ހަސީނާ އިސްތިއުފާ ދެއްވައި ގައުމުން ވަޑައިގެންނެވުމާ އެކީ އުފެއްދި ވަގުތީ ސަރުކާރުފެ ވެރިޔަކީ އެއްވެސް ޕާޓީއަކަށް ނިސްބަތް ނުވާ މުހައްމަދު ޔޫނުސް އެވެ.
އަވާމީ ލީގް ޕާޓީ އަށް ނިސްބަތްވާ ހަސީނާ، 76، އެންމެ ފަހުން ބޮޑުވަޒީރު ކަމަށް ވަޑައިގެންނެވީ 2009 ގަ އެވެ. އޭނަ 1996-2006 އަށް ވެސް ބޮޑުވަޒީރުކުރަން ކުރެއްވި އެވެ.
ހަސީނާ އަކީ ބަންގްލަދޭޝް އަށް މިނިވަންކަން ހޯދައި ދެއްވި ލީޑަރު އަދި އެ ގައުމުގެ ފުރަތަމަ ރައީސް ޝޭހް މުޖީބުއް ރަހުމާންގެ ދަރިކަނބަލެކެވެ.