ހޮލީވުޑްގެ މަގުބޫލު "އެވަޓާ" ފްރެންޗައިޒްގެ ތިން ވަނަ ފިލްމުގެ ނަމާއި އެ ރިލީޒްކުރަން ހަމަޖެހިފައިވާ ތާރީހު މިއަދު އިއުލާންކޮށްފި އެވެ.
އަންނަ އަހަރުގެ ޑިސެންބަރު 19 ގައި ގެނެސްދޭން ތާވަލުކުރި ފިލްމުގެ ނަމަކީ "އެވަޓާ: ފަޔާ އެންޑް އޭޝް" އެވެ. މި ފިލްމުގެ މަސައްކަތްތައް ބަރަށް ބާރަށް ކުރިއަށްދާ ކަމަށް ފިލްމުގެ ޓީމުން ބުނެފައިވެ އެވެ.
"އެވަޓާ" ގެ ދެވަނަ ފިލްމަކީ 2022 ގައި ގެނެސްދިން "އެވަޓާ: ދަ ވޭ އޮފް ވޯޓާ" އެވެ. ޑިސެމްބަރު 16، 2022 ގައި ރިލީޒްކުރި އެ ފިލްމަކީ ޖުމްލަ 430 މިލިއަން ޑޮލަރުގެ ބަޖެޓަކުން ހެދި ފިލްމެކެވެ. އަދި ބޮކްސް އޮފީހުގައި ފިލްމަށް 2.320 ބިލިއަން ޑޮލަރުގެ އާމްދަނީއެއް ލިބިފައިވެ އެވެ.
ދެހާސް ނުވައެއްގައި ގެނެސްދިން "އެވަޓާ" ގެ ފުރަތަމަ ފިލްމަކީ މިހާތަނަށް ބޮކްސް އޮފީހުގައި އެންމެ ބޮޑު އާމްދަނީއެއް ހޯދުމުގެ ރެކޯޑް އޮތް ފިލްމެވެ. ޖުމްލަ 237 މިލިއަން ޑޮލަރުގެ ބަޖެޓަކުން ގެނެސްދިން ފިލްމުގެ އާމްދަނީ އަކީ 2.923 ބިލިއަން ޑޮލަރެވެ.
"އެވަޓާ" ފްރެންޗައިޒްގެ ޑައިރެކްޓަރަކީ ބެލުންތެރިންގެ މެދުގައި ބޮޑު މަގުބޫލު ކަމެއް ހޯދި 1997 ގެ "ޓައިޓޭނިކް" ވެސް ގެނެސްދިން ޖޭމްސް ކޮމެރޮން އެވެ.
"އެވަޓާ" ގެ ތިން ވަނަ ފިލްމުގެ ނަމާއި ތާރީހު އިއުލާންކުރި އިރު ސައިންސް ފިކްޝަން ޖޯންރާގެ މި ފިލްމު ސީރިޒްގެ އިތުރު ދެ ފިލްމެއް ވެސް އަދިވެސް ކުރިއަށް ރޭވިފައި އެބައޮތެވެ.