"ކޭޖީއެފް" ގެ ދެ ފިލްމާއި "ސަލާރު" ފަދަ ވަރުގަދަ ފިލްމުތައް ގެނެސްދިން އިންޑިއާގެ ކުޅަދާނަ ކަންނާޑާ/ތެލެގޫ ޑައިރެކްޓަރު ޕްރަޝާންތު ނީލްގެ އާ ފިލްމުގެ މަސައްކަތް އިއްޔެ ފަށައިފި އެވެ.
މަޝްހޫރު ތެލެގޫ އެކްޓަރު އެންޓީއާރް ޖޫނިއާއާ އެކީ ހަދާ ފިލްމުގެ ޝޫޓިން އިއްޔެ ރަސްމީކޮށް ފެށި ނަމަވެސް ފިލްމުގެ ނަން އަދިވެސް އިއުލާނެއް ނުކުރެ އެވެ. އަދި މީގެ ބަތަލާ އާއި އިތުރު ކާސްޓުންނަކީ ކޮބައި ކަމެއް ވެސް ހާމަކޮށްފައެއް ނުވެ އެވެ.
ފިލްމު ސިނަމާތަކަށް ގެންނާނީ ޖެނުއަރީ 9، 2026 ގަ އެވެ.
ނަމަވެސް އަލަށް، އެންޓީއާރްއާ އެކީ ޕްރަޝާންތު ފިލްމެއް ހަދާތީ މިއީ އަނެއްކާ ވެސް ވަރަށް ވަރުގަދަ ފިލްމަކަށް ވާނެ ކަމަށް ގިނަ ބަޔަކު ގަބޫލު ކުރެ އެވެ. ޔާޝްއާ އެކީ ގެނެސްދިން "ކޭޖީއެފް" ގެ ދެ ފިލްމަށް ފަހު، ޕްރަބާސްއާ އެކީ "ސަލާރު" ގެނެސްދިނީ މިދިޔަ އަހަރު އެވެ.
އޭގެ ދެވަނަ ބައެއް ވެސް ހަދަން އޮތީ ނިންމައިފަ އެވެ.
މިހާރު އިންޑިއާގެ އެންމެ ވަރުގަދަ ޑައިރެކްޓަރުންގެ ތެރޭގައި ހިމެނޭ ޕްރަޝާންތުގެ ފުރަތަމަ ފިލްމަކީ 2014 ގެ އެކްޝަން ތުރިލާ "އުގްރަމް" އެވެ.
އެންޓީއާރް އާ ފިލްމެއްގެ މަސައްކަތް ފެށި އިރު 2022 ގެ ބޮޑު ހިޓް "އާރްއާރްއާރް" އަށް ފަހު އޭނަ ކުޅުނު ފުރަތަމަ ފިލްމު "ދެވާރާ: ޕާޓް 1" އަންނަ މަހުގެ 27 ގައި ރިލީޒްކުރާނެ އެވެ. ކާސްޓްގައި ސައިފް އަލީ ޚާން ވެސް ހިމެނޭ މި ފިލްމުގެ ބަތަލާ އަކީ ޖާންވީ ކަޕޫރެވެ.
އަންނަ އަހަރު ރިލީޒް ކުރާނެ ކަމަށް ބެލެވޭ ރިތިކް ރޯޝަންގެ "ވޯ 2" ވެގެން ދާނީ އެންޓީއާރްގެ ފުރަތަމަ ބޮލީވުޑް ފިލްމަށެވެ.