ރާއްޖޭގެ އެންމެ ބޮޑު ސިޔާސީ ޕާޓީއަށް ހެދުމުގެ އަމާޒުގައި ވެރިކަން ކުރާ ޕާޓީ، ޕީއެންސީ އަށް ޕީޕީއެމުން ވެސް ގިނަ މެންބަރުންތަކެއް ވައްދަން ނިންމައި، ޕާޓީގެ މެންބަޝިޕް އިތުރު ކުރުމުގެ މަސައްކަތް ފަށައިފި އެވެ.
އެ ޕާޓީން ބުނީ މިހާރު ޕާޓީއަށް މެންބަރުން އިތުރު ކުރުމުގެ ހަރަކާތްތަކެއް ރާއްޖޭގެ ހުރިހާ ހިސާބެއްގައި ވެސް ކުރިއަށްދާ ކަމަށެވެ. އަދި މި މަސައްކަތުގެ ތެރެއިން މާލެ އާއި ވިލިމާލޭގެ އިތުރުން 12 ދާއިރާއެއްގައި މިހާރު ވެސް ކުރިއަށްދާ ކަމަށް ޕީއެންސީން ބުންޏެވެ.
މެންބަޝިޕް އިތުރު ކުރަން ހިންގާ ހަރަކާތްތަކުގައި ޕާޓީއަށް ވަންނަން ޝައުގުވެރިވާ ފަރާތްތަކުގެ ފޯމުގެ ޕީއެންސީގެ ޓީމުތަކުން ފުރައި ދޭނެ އެވެ.
އަމާޒަކީ ރާއްޖޭގެ އެންމެ ބޮޑު ޕާޓީ އަށް ޕީއެންސީ ހެދުމެވެ. އެ ޕާޓީ އަކީ މިހާރު މަޖިލީހުގެ ސުޕަ މެޖޯރިޓީ ވެސް އޮތް ޕާޓީ އެވެ.
އިލެކްޝަން ކޮމިޝަން (އީސީ) ގެ ދަފުތަރުން ދައްކާ ގޮތުގައި ޕީއެންސީގައި ރަޖިސްޓްރީގައި މިހާރު ވެސް 28،704 މެންބަރުން އެބަތިއްބެވެ. ޕީޕީއެމްގައި 34،827 މެންބަރުން ތިބި އިރު، އެމްޑީޕީގައި 50،980 މެންބަރުން އެބަތިއްބެވެ.
ރިޔާސީ އިންތިހާބުގެ ބޮޑު ކާމިޔާބީ އަސް ފަހު ޕީއެންސީ އަށް ވަންނަ މީހުން ވަރަށް ބޮޑަށް އިތުރުވެފައިވާކަން ފާހަގަކުރެވެ އެވެ. އެ ޕާޓީ އަށް ޕީޕީއެމުން މެންބަރުން ވައްދަން މަސައްކަތްކުރާ އިރު، ޕީޕީއެމް އުވައިލަން އުޅޭކަމުގެ އަޑުތަކެއް އަރާފައިވެ އެވެ.