އިންޑިއާގެ އެކްސްޓަރނަލް އެފެއާޒް މިނިސްޓަރު ޑރ. ސުބްރަމާނިއަމް ޖަޔަޝަން ރާއްޖެއަށް ކުރައްވާ ދަތުރުފުޅަކީ ދެ ގައުމުގެ ގުޅުން އިތުރަށް ހަރުދަނާވާ ކަމުގެ ހެއްކެއް ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް މުއިއްޒު މިފަދައިން ވިދާޅުވީ ރާއްޖޭގެ 28 ރަށެއްގެ ފެނާއި ނަރުދަމާ ނިޒާމު ގާއިމުކޮށް ނިންމާ ދިވެހި ސަރުކާރާ ހަވާލުކުރުމަށް ބޭއްވި ރަސްމިއްޔާތުގައި ވާހަކަ ދައްކަވަމުންނެވެ.
އެގޮތުން ރައީސް މުއިއްޒު ވިދާޅުވީ އިންޑިއާއަކީ އަބަދުވެސް ރާއްޖޭގެ އެންމެ ގާތް އަދި އަގުނުކުރޭނެވަރުގެ ބައިވެރިއެއް ކަމަށެވެ. އަދި ރާއްޖެއަށް އެހީތެރިކަމަށް ބޭނުންވާ ކޮންމެ ހިނދެއްގައި އެ އެހީތެރިކަން ފޯރުކޮށްދެމުން އަންނަ ޤައުމެއްކަންވެސް ރައީސް ފާހަގަކުރެއްވިއެވެ.
ރައީސް މުއިއްޒު ވިދާޅުވީ ޖައިޝަންކަރުގެ ދަތުރަކީ އިންޑިއާއާއި ރާއްޖޭގެ ތާރީހީ ގުޅުން އިތުރަށް ހަރުދަނާވަމުން އަންނަ ކަމުގެ ހެއްކެއް ކަމަށެވެ. އަދި ދެ ގައުމުގެ ގުޅުން އިތުރަށް ހަރުދަނާކޮށް އާހަރުފަތަކަށް ގެންދިއުމަށް އެއްބާރުލުން ދެއްވާނެކަމުގެ ޔަގީންކަން އަރުވާފައިވެއެވެ. މީގެއިތުރުން އުންމީދަކީ ދެ ޤައުމުގެ ގުޅުން އިތުރަށް ބަދަހިވެ ހަރުދަނާ ވެގެންދިޔުން ކަމަށްވެސް ރައީސް ވިދާޅުވިއެވެ.
މީގެއިތުރުން ރައީސް މުއިއްޒު ވިދާޅުވީ މިއަދު ހަވާލުކުރެވުނު ފެނާއި ނަރުދަމާގެ މަސައްކަތްފަދަ ކަންކަމުގެ ސަބަބުން، ރާއްޖޭގެ ރައްޔިތުންނަށް މިހާރަށްވުރެ ތަނަވަސް، ފުރިހަމަ މުސްތަޤްބަލެއް ލިބޭނެކަމުގެ އުއްމީދު އާވެގެންދާ ކަމަށެވެ. އަދި ރަހުމަތްތެރި ޤައުމުތަކުން އެކި ގޮތްގޮތުން ފޯރުކޮށްދޭ އެހީތެރިކަމާއި މާލީ އެހީތެރިކަމާއި، އަދި ވަކިން ޚާއްޞަކޮށް އިންޑިއާއިން ފޯރުކޮށްދޭ އެހީތެރިކަން ފާހަގަކުރައްވާފައިވެއެވެ.