ދަށުކޯޓުތަކުގެ ފަނޑިޔާރުންގެ ތެރެއިން ޖުޑިޝަލް ސާވިސް ކޮމިޝަން (ޖޭއެސްސީ) އަށް އިންތިހާބުކުރާ ފަނޑިޔާރަކު ހޮވުމަށް ބޭއްވި އިންތިހާބު ސިވިލް ކޯޓުގެ ޤާޟީ އަލްއުސްތާޛު ފަރުހާދު ރަޝީދު ކާމިޔާބު ކުރައްވައިފިއެވެ.
ދަށުކޯޓުތަކުގެ ފަނޑިޔާރުންގެ ތެރެއިން އެ ކޯޓުތަކުން ޖުޑީޝަލް ސަރވިސް ކޮމިޝަނަށް އިންތިޚާބުކުރާ ފަނޑިޔާރު ހޮވުމަށް ބޭއްވި އިންތިހާބު ކުރިއަށް ގެންގޮސްފައިވަނީ މިއަދު ހެނދުނު 10:00 އިން 12:00 އަށެވެ.
މި އިންތިހާބުގައި ވާދަކުރައްވާފައިވަނީ ކްރިމިނަލް ކޯޓުގެ ޤާޟީ އަލްއުސްތާޛު އިބްރާހީމް އިޙްސާން، އެށެވެލި/ ސ. މަރަދޫ، ސިވިލް ކޯޓުގެ ޤާޟީ އަލްއުސްތާޛާ ޢާއިޝަތު ޢަޒުފާ ޢަބްދުލްޣަފޫރު، މއ.ޕެންޒީވިލާ/ މާލެ، ސިވިލް ކޯޓުގެ ޤާޟީ އަލްއުސްތާޛު ފަރުހާދު ރަޝީދު، ލަންސިމޫގެ/
ގދ. ފިޔޯރީ، ފެމިލީ ކޯޓުގެ ޤާޟީ އަލްއުސްތާޛު ޢަބްދުﷲ މުޙައްމަދު، ބަހާރުގެ/ ރ. ހުޅުދުއްފާރު އަދި ސ. ހިތަދޫ މެޖިސްޓްރޭޓް ކޯޓުގެ މެޖިސްޓްރޭޓް އަލްއުސްތާޛު ރަފީޢުއްދީން އަޙްމަދު، ސްނޯޑްރޮޕް/ ސ. ހިތަދޫ އެވެ.
މި އިންތިހާބު ކާމިޔާބު ކުރެއްވި ފަރުހާދު ރަޝީދު ވަނީ 91 ވޯޓު ހޯއްދަވާފައެވެ. ދެވަނައަށް އެންމެ ގިނަ ވޯޓު ހޯއްދެވި ކްރިމިނަލް ކޯޓުގެ ޤާޟީ އަލްއުސްތާޛު އިބްރާހީމް އިޙްސާންއަށް 71 ވޯޓު ލިބުނެވެ.
މި އިންތިހާބުގައި ވޯޓު ދިނުމުގެ ހައްޤު ލިބިފައިވަނީ ޖުމުލަ 166 ފަނޑިޔާރަކަށެވެ. ވޯޓު ދެއްވާފައިވަނީ 163 ފަނޑިޔާރުންނެވެ.