އިންޑިއާގެ އެކްސްޓާނަލް އެފެއާޒް މިނިސްޓަރު ޑރ. ސުބްރަމަނިއަމް ޖައިޝަންކަރު މިހާރު ކުރައްވަމުން ގެންދަވާ ދަތުރުގެ ތެއިން މާލޭގައި މިއަދު ގަހެއް އިންދަވައިފި އެވެ.
ލޮނުޒިޔާރަތް ޕާކުގައި އޭނަ އިންދެވީ ކާމަރަނގަ ގަހެކެވެ. އެ ގަސް އިންދަން ބޭއްވި ރަސްމިއްޔާތުގައި އެންވަޔަރަމަންޓް މިނިސްޓަރު ތޯރިގް އިބްރާހީމާއި ފޮރިން މިނިސްޓަރު މޫސާ ޒަމީރުގެ އިތުރުން މާލޭގެ މޭޔަރު އާދަމް އާޒިމް ބައިވެރިވެވަޑައިގެންނެވި އެވެ.
މިނިސްޓްރީން ބުނީ ޖައިޝަންކަރު ގަހެއް އިންދެވީ ރާއްޖޭގައި ފަށާފައިވާ 5،000،000 ގަސް އިންދުމުގެ ޕްރޮގްރާމާއި އިންޑިއާގެ "ޕްލާންޓް ފޯ މަދާ އިނީޝިއޭޓިވް" ގެ ދަށުން ކަމަށެވެ. އަދި މިކަމަކީ އިންޑިއާ އާއި ރާއްޖެއާ ދެމެދު އޮތް ދެމިގެންވާ ރަޙުމަތްތެރިކަން ދައްކުވައިދޭ ކަމެއް ކަމަށް ވެސް މިނިސްޓްރީއިން ބުންޏެވެ.
ޖައިޝަންކަރު ވިދާޅުވީ އެ ގަސް އިންދުމަކީ ދެމެހެއްޓެނިވި މުސްތަގުބަލަކަށްކުރާ މަސައްކަތާއި ދެ ގައުމުގެ ދެމެދު އޮތް ދެމިގެންވާ ގުޅުމުގެ ރަމްޒެއް ކަމަށެވެ.