ރިޝްވަތު ނަގައިގެން ޖަލުތަކަށް މަސްތުވާތަކެއްޗާއި އެހެން ވެސް ތަކެތި ވެއްދި މައްސަލައިގައި ޖޫން މަހުގެ ތެރޭގައި ހައްޔަރުކުރި ޖަލު އޮފިސަރުންގެ ވަނަވަރު އާންމުކޮށްފި އެވެ.
ޖޫން 28 ވަނަ ދުވަހު ހައްޔަރުކުރި އޮފިސަރުންގެ މައްޗަށް ދައުވާ ކުރަން ވެސް މިހާރު ވަނީ ފޮނުވައިފަ އެވެ. އޭގެ ތެރޭގައި ހިމެނެނީ ކަރެކްޝަނަލް ސާވިސްގެ 13 އޮފިސަރެކެވެ.
* މާޒިން ހަމީދު، 22، ފ. ނިލަންދޫ/ހަވޭލި
* ޖިނާހު އަބުއްދުއްރަހީމް، 29، ރ. އުނގޫފާރު/އައިވަރީ ހައުސް
* މުހައްމަދު ފަތޫހް އަބްދުﷲ، 24، ގއ. ވިލިގިލި/ކުއްޅަވައްހެ
* އަލީ ހިޝާމް، 33، ކ. މާފުށި/ބީޗްހައުސް
* މުހައްމަދު ނަބްހާން، 30، މާލެ/އިވްނިން ސްޓާ
* މުހައްމަދު ނަބީލް އިބްރާހީމް، 21، މާލެ/މޭދާ
* އަލީ ނާޒިމް، 36، ހދ. ނޭކުރެންދޫ/ތަރާނާ
* ޒަޔާން އަހުމަދު، 23، މާލެ/މާވިނަ
* ޔާމީން ހުސައިން، 23، ރ. މީދޫ/ހިޖާޒު
* އަހުމަދު ޝަމާލް، 24، ށ. ފޯކައިދޫ/ފަހާގެ
* މުހައްމަދު ރިމާޒު، 29، ށ. ފޯކައިދޫ/ދަނބުމާގެ
* އަހުމަދު އަނޫފް، 27، ކ. ކާށިދޫ/ބިންމަތީގެ
* އަލީ އަޝްފާގް، 32، ނ. ލަންދޫ/ކާމިނީގެ
ފުލުހުން ހިންގި އޮޕަރޭޝަނެއްގައި ހައްޔަރުކުރި އޮފިސަރުންގެ ތެރޭގައި ހިމެނެނީ ކ. މާފުށިން ނުވަ އޮފިސަރުންނާއި، ކ. ކާށިދޫން ދެ އޮފިސަރުންގެ އިތުރުން ހއ. އުތީމުން އޮފިސަރަކާއި މާލެއިން އޮފިސަރެއް ކަމަށެވެ. އެ މީހުން ހައްޔަރުކުރުމަށް ފަހު، އެ މީހުން ދިރިއުޅެމުން ދިޔަ ތަންތަން ބަލާފާސްކޮށްފައިވާ ކަމަށް ވެސް ފުލުހުން ބުނެފައިވެ އެވެ.
ހޯމްލޭންޑް މިނިސްޓަރު އަލީ އިހުސާން ވިދާޅުވެފައި ވަނީ ރިޝްވަތު ނަގައިގެން ޖަލަށް މަސްތުވާތަކެތި ވެއްދުމުގެ މައްސަލައިގައި 18 ކަރެކްޝަންސް އޮފިސަރުން ހިމެނޭ ކަމަށާއި އެ އޮފިސަރުންގެ އެކައުންޓްތަށް މިދިޔަ އަހަރު އެކަނި ވެސް 73.3 މިލިއަން ރުފިޔާ ޖަމާކޮށްފައިވާ ކަމަށެވެ.
އިހުސާން ވިދާޅުވީ ޔުނީފޯމު އެޅި އެއްވެސް އޮފިސަރަކު އޭނާގެ މަގާމުގެ ނުފޫޒާއި ލިބިފައިވާ އިމްތިޔާޒުތަކުގެ ބޭނުންކޮށްގެން ފައިސާ ނަގައި ފައިސާއަށްޓަކައި އެ މީހާގެ ޔުނީފޯމު ވިއްކާލުމުގެ މައްސަލަތަކުގައި ހަރުކަށި ފިޔަވަޅު އަޅުއްވާނެ ކަމަށެވެ.
މިނިސްޓަރު ވިދާޅުވީ އޮފިސަރުންގެ އެކައުންޓުތަކަށް މިލިއަނުން ފައިސާ ވަން އިރު، އެ މައުލޫމާތު މިހާތަނަށް ނުލިބި ފެއިލްވި ގޮތް ވެސް ތަހުގީގު ކުރާނެ ކަމަށެވެ.