ރަސްމީ ދަތުރުފުޅެއްގައި ރާއްޖެ ވަޑައިގެން އުޅުއްވާ އިންޑިއާގެ އެކްސްޓަރނަލް އެފެއާރސް މިނިސްޓަރ ޑރ. ސުބްރަމާނިޔަމް ޖައިޝަންކަރާއެކު ދިފާޢީ ވަޒީރު މުޙައްމަދު ޣައްސާން މައުމޫން ރަސްމީ މަޝްވަރާތައް ބާއްވައިފި އެވެ.
ޑިފެންސް މިނިސްޓްރީން ބުނީ މިއަދުގެ މި ބައްދަލުވުމުގައި މަޝްވަރާ ކުރެއްވި މައިގަނޑު ދާއިރާތަކަކީ ދިފާޢީ އަދި ސަލާމަތާ ގުޅޭ ގޮތުން ދެ ޤައުމުން އެއްބާރުލުން ދިނުމާއި ސަރަޙައްދީ ސަލާމަތާ ރައްކާތެރިކަމަށް ހުރި ގޮންޖެހުންތައް ދެނެގަނެ، މިފަދަ ކަންކަމަށް ޙައްލު ހޯދުމަށް ދެ ޤައުމު ގުޅިގެން ސަލާމަތީ އިސްތިރާޖީތައް އެކުލަވާލުމާ ގުޅޭ ގޮތުން ކަމަށެވެ.
އަދި ދެ ޤައުމުގެ އިސްތިޤްލާލާއި ސަރަޙައްދީ އިންފާރުތަކަށް އިޙްތިރާމްކުރުމާއެކު، ސަރަޙައްދުގެ ސަލާމަތާ ހަމަޖެހުމަށާއި، ކަނޑުގެ ސަރަޙައްދުތަކުގެ ރައްކާތެރިކަމަށް މަސައްކަތްކުރުމަށާއި، ދެ ފަރާތުގެ މަސްލަހަތު ހިމެނޭ އިތުރު ކަންކަމުގައި އެއްބާރުލުން އިތުރުކުރުމާ ގުޅޭގޮތުންވެސް ދެ ބޭފުޅުން މަޝްވަރާ ކުރެއްވި ކަމަށް މިނިސްޓްރީން މައުލޫމާތުދެ އެވެ.