މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ އޮނިގަނޑަށް ގެނައި ބަދަލުތަކާ އެކީ އެތަނަށް ފަސް މެނޭޖިން ޑިރެކްޓަރުންލާ ގޮތަށް ނިންމުމާ ގުޅިގެން މި ސަރުކާރުގެ ކޯލިޝަންގައި ހިމެނޭ މޯލްޑިވްސް ނެޝަނަލް ޕާޓީ (އެމްއެންޕީ) ގެ ރައީސް އަދި ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެންބަރު މުހައްމަދު ނާޒިމް (ކާނަލް ނާޒިމު) ފާޑު ވިދާޅުވެއްޖެ އެވެ.
އޭނަ ސޯޝަލް މީޑިއާ ޕޯސްޓެއްގައި ވިދާޅުވީ އިގުތިސާދީ މި ދަތިކަމުގެ ތެރޭގައި މަރުކަޒީ ބޭންކަށް ފަސް މެނޭޖިން ޑިރެކްޓަރުން އައްޔަން ކުރުމަކީ، ދައުލަތުން އުފުލަން ޖެހޭ އިތުރު މާލީީ ބުރައަކަށް ވާނެ ކަމަށެވެ.
"އެހެންކަމުން ހަރަދު ކުޑަ ކުރުމަށް ލީޑަޝިޕްގެ ސްޓްރަކްޗަ ހަރުދަނާކުރުމަށް އެމްއެމްއޭގެ ގަވަނަރަށް އިލްތިމާސްކުރަން." ނާޒިމް ވިދާޅުވި އެވެ.
އެމްއެމްއޭ އަށް 5 އެމްޑީން ހޯދަން މި މަހުގެ 8 ގައި އިއުލާން ވެސްކޮށްފަ އެވެ.
އެމްއެމްއޭ އަށް މެނޭޖިން ޑިރެކްޓަރުން ހޯދަނީ އެތަނުގެ މަނިޓަރީ ޕޮލިސީ، ރިސާޗް އެންޑް ސްޓެޓިސްޓިކްސްއަށާއި
ފައިނޭންޝަލް ސްޓެބިލިޓީއަށާއި ބޭންކިން އޮޕަރޭޝަންސްއަށާއި ކޯޕަރޭޓް ސާވިސަސްގެ އިތުރުން ފައިނޭންޝަލް ސެކްޓަ ޑިވަލަޕްމަންޓަށެވެ.
އެމްޑީންގެ މުސާރައަކީ 50،000-55،000ރ. އާ ދެމެދުގެ އަދަދެކެވެ. އަދި މަގާމުގެ މުއްދަތަކީ ފަސް އަހަރެވެ. މަގާމުތަކަށް ޝައުގުވެރިވާ ފަރާތްތަަކަށް މި މަހުގެ 22 އާ ހަމައަށް ވަނީ ކުރިމަތިލާން ހުޅުވާލައިފަ އެވެ.
ހިންގުން މިހާރަށް ވުރެ ހަރަދަނާ ކުރަން ކަމަށް ބުނެ އެމްއެމްއޭގެ އޮނިގަނޑަށް ބަދަލުތަކެއް ގެނައީ އާ ގަވަރުނަރަކަށް އަހުމަދު މުނައްވަރު މިދިޔަ މަހުގެ 31 ގައި އައްޔަން ކުރުމާ އެކީގަ އެވެ.