އާދަޔާހިލާފު ގޮތްގޮތަށް ނިވާކަން ކުޑަކޮށް، ހެދުން އަޅައިގެން އާންމުންގެ ތެރެއަށް ނުކުމެ މަޝްހޫރުކަން ހޯދި އިންޑިއާގެ ސެލެބްރިޓީ އުރްފީ ޖާވިދުގެ ޝޯއެއް އެމެޒޯން ޕްރައިމް ވީޑިއޯ އިން ގެނެސްދޭން ތައްޔާރުވެއްޖެ އެވެ.
މި މަހުގެ 23 ގައި ޕްރީމިއާކުރަން ހަމަޖެހިފައިވާ މި "އަންސްރިޕްޓެޑް" ޝޯގެ ނަމަކީ "ފޮލޯ ކަރް ލޯ ޔާރު" އެވެ. ހިންދީ ބަހުން މި ޝޯ ގެނެސްދޭނީ އިނގިރޭސި ސަބްޓައިޓްލްއާ އެކީގަ އެވެ.
ސަންދީޕް ކުކްރެޖާ ޑައިރެކްޓްކޮށްފައިވާ 9 އެޕިސޯޑަށް ގެނެސްދޭން ހަމަޖެހިފައިވާ "ފޮލޯ ކަރް ލޯ ޔާރު" އިން އުރްފީގެ އާންމު ދިރިއުޅުމުގެ ވައްޓަފާޅި އާއި އޭނަގެ ނުފޫޒު މިހާރު ޒުވާނުންގެ މެދުގައި އޮތް މިންވަރު ވެސް ދައްކުވައި ދޭނެ އެވެ.
ކަލާސްގެ ރިއަލިޓީ ޝޯ، "ބިގް ބޮސް" ގައި ވެސް ވާދަކޮށްފައިވާ އުރްފީ މި އަހަރުގެ ކުރީކޮޅު ބޮލީވުޑްގެ ފިލްމަކުން ވެސް ފެނިފައިވެ އެވެ. އެއީ އެކްތާ ކަޕޫރް ޕްރޮޑިއުސްކޮށް، ޑައިރެކްޓަރު ދިބާކަރް ބެނަޖީ އެޕްރީލްގައި ގެނެސްދިން ލަވް، ސެކްސް އޯރް ދޯކާ 2 (އެސްއެލްޑީ 2) އެވެ.