އިމާމުވެ ހުކުރު ކުރާނެ ޒުވާން ޙަތީބުން ތަމްރީނު ކުރަން މިހާރު ކުރިއަށް ގެންދާ ދެވަނަ ބެޗް މި މަހުގެ ތެރޭގައި ނިމޭނެ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.
މާލެ އާއި އައްޑޫގައި ހިންގަމުން އަންނަ ތަމްރީނާއި އަދި އެހެން ހިސާބުތަކުން އޮންލައިންކޮށް ބައިވެރިވާ ދަރިވަރުންނާ އެކީ 200 ދެވަނަ ބެޗްގެ ތަމްރީނު ފެށީ މި މަހުގެ 1 ގަ އެވެ.
މިނިސްޓަރު ޝަހީމު ވިދާޅުވީ މި މެޗްގެ ތަމްރީނު މި މަހުގެ ތެރޭގައި ނިންމައި ބައިވެރިންނަށް ސަނަދު ވެސް ދެވޭނެ ކަމަށެވެ. މިނިސްޓަރު ފާހަގަކުރެއްވި ގޮތުގައި މި ޕްރޮގްރާމް ނިމުމާ އެކީ ފާއިތުވި 8 މަހުގެ ތެރޭގައި ތަމްރީނު ކުރެވުނ ޒުވާން ޚަތީބުންގެ އަދަދު 300 އަށް އަރާނެ އެވެ.
މި އަހަރުގެ ކުރީކޮޅު ފުރަތަމަ ބެޗް ހިންގީ 100 ބައިވެރިންނާ އެކީގަ އެވެ.
މިނިސްޓަރު ވިދާޅުވީ ފަސް އަހަރުގެ ތެރޭގައި 1،000 އެއްހާ ޒުވާން ޚަތީބުން ތަމްރީނު ކުރުން ކަމަށެވެ.
"ރީތިކޮށް ޤުރުއާން ކިޔަވައި ޚުޠުބާ ކިޔައި ބަންގިގޮވާ ޒުވާން ޖީލެއް ނެރުން އަމާޒަކީ،" މިނިސްޓަރު ވިދާޅުވި އެވެ. "މިއީ ރައީސްގެ ފުރިހަމަ އިރުޝާދުގެ ދަށުން ކުރިއަށް ގެންދެވޭ ވަރަށް ޚާއްޞަ މަޝްރޫޢެއް. މިކަމަށް ލިބިގެން ދިޔަ ތަރުޙީބަށްޓަކައި އުފާކުރަން."
ޒުވާން ޙަތީބުން ތަމްރީނު ޕްރޮގްރާމަކީ ގްރޭޑް 10، 11 އަދި 12 ގައި އުޅޭ ދަރިވަރުންނަށާއި ސްކޫލް ނިމިފައިވާ ދަރިވަރުންނަށް ހާއްސަކޮށްގެން ހިންގާ ޕްރޮގްރާމެކެވެ.