ގާޒާގެ ހާލަތާ މެދު ވަރަށް ކަންބޮޑުވެވަޑައިގަންނަވާ ކަމަށާއި ހަމަލާތައް ހުއްޓާލަން އެއްބަސްވުމަކަށް ދިއުން ވަރަށް މުހިއްމު ކަމަށް އެމެރިކާގެ ނައިބު ރައީސް ކަމާލާ ހެރިސް ވިދާޅުވެއްޖެ އެވެ.
މި އަހަރު ބާއްވާ އެ ގައުމުގެ ރިޔާސީ އިންތިހާބުގައި ޑިމޮކްރެޓިކް ޕާޓީގެ ފަރާތުން ވާދަކުރައްވާ ކެންޑިޑޭޓް ވަނީ އިއްޔެ ރޭ ފަތިހު ގާޒާގެ ސްކޫލަކަށް އިޒްރޭލުން ދިން ހަމަލާއާ މެދު ވެސް ކަންބޮޑުވުން ފާޅުކުރައްވައިފަ އެވެ. އެ ހަމަލާގައި އަންހެނުންނާއި ކުޑަކުދިންނާއު އުމުރުން ދުވަސްވީ މީހުހުން ހިމެނޭހެން 100 އަށް ވުރެ ގިނަ މީހުން ޝަހީދުވެފައިވެ އެވެ.
ކަމާލާ ވިދާޅުވީ މިފަދަ ކޮންމެ ހަމަލާއެއްގައި އެތައް އާންމުންގެ ފުރާނަ ގެއްލިގެން ދިއުމަކީ ވަރަށް ވެސް ހިތާމަހުރި ކަމެއް ކަމަށެވެ.
"މިހާރު ވެސް މި ހަނގުރާމައިގެ އެތަކެއް ހާސް އާންމުންގެ ފުރާނަ ގެއްލިއްޖެ،" އެރިޒޯނާގައި އޮތް ކެމްޕޭން އިވެންޓެެއްގައި ކަމާލާ ވިދާޅުވި އެވެ. "ގާޒާގެ ހާލަތާ މެދު އިންތިހާ އަށް ކަންބޮޑުވޭ. އެހެންވީމަ އެބަޖެހޭ ސުލްހައިގެ އެއްބަސްވުމަކާ ހަމައަށް ދާން."
އޭނަ ވިދާޅުވީ ގާޒާގެ ހާލަތު ބަދަލު ކުރުމަށްޓަކައި އިޒްރޭލުން ފަަލަސްތީނުން ހަނގުރާމަ ހުއްޓާލަން އެއްބަސްވުމަކަށް އަންނަން ޖެހޭ ކަމަށެވެ. އެގޮތުން އެކަމަށް މަޝްވަރާކޮށް ހައްލުތަކެއް ހޯދަން ވަރަށް މުހިއްމުވެފައިވާ ކަމަށް ވިދާޅުވި އެވެ.
ގާޒާގެ ހާލަތާ މެދު ކަންބޮޑުވެވަޑައިގަންނަވާ ކަމަށް ކަމާލާ ވިދާޅުވި އިރު، މިދިޔަ އަހަރުގެ އޮކްޓޯބަރު 7 އިން ފެށިގެން އިޒްރޭލުން ހިންގަމުންދާ ޖަރީމާތަކަށް އެންމެ ބޮޑަށް ވާގިދޭ ގައުމަކީ އެމެރިކާ އެވެ. އެގޮތުން އިޒްރޭލަށް އެމެރިކާ އިން ދަނީ ހަތިޔާރުގެ އެހީތެރިކަން ހުއްޓުމެއް ނެތި ފޯރުކޮށް ދެމުންނެވެ.
މި ހަތިޔާރުގެ އެހީގައި އިޒްރޭލުން ފަލަސްތީނުގެ ނަސްލު ނައްތައިލަން ކުރަމުންދާ ހަނގުރާމައިގައި މިހާތަނަށް 40،000 އެއްހާ މޫހުން ޝަހީދުކޮށް، ފަލަސްތީނުގެ ރައްޔިތުން ހާލުގައި ޖައްސާފައިވެ އެވެ.