އެމެރިކާގެ ރައީސް ކަމަށް ވާދަކުރައްވާ ރިޕަބްލިކަން ޕާޓީގެ ކެންޑިޑޭޓް ޑޮނަލްޑް ޓްރަމްޕްގެ ކެމްޕޭން އިވެންޓެއްގައި މަޝްހޫރު ފިލްމު "ޓައިޓޭނިކް" ގެ ތިމް ލަވަ "މައި ހާޓް ވިލް ގޯ އޯން" ބޭނުން ކުރުމާ ގުޅިން އެ ލަވަ ކިޔާފައިވާ ސެލީން ޑިއޯން ކަންބޮޑުވުން ފާޅުކޮށްފި އެވެ.
ޖޭމްސް ކެމެރޮން ޑައިރެކްޓްކޮށް، ލިއޮނާޑޯ ޑި ކެޕްރިއޯ އާއި ކޭޓް ވިންސްލެޓާ އެކީ 1997 ގައި ގެނެސްދިން މަގުބޫލު ފިލްމުގެ ތީމް ލަވަ، އިވެންޓެއްގައި ސެލީން ކިޔާ މަންޒަރު ފެންނަ ވީޑިއޯއެއް ޓްރަމްޕްގެ ކެމްޕޭންގައި ބޭނުންކުރީ މިދިޔަ ހުކުރު ދުވަހުގެ މޮންޓާނާގަ އެވެ.
Trump campaign plays the theme from the Titanic at his rally pic.twitter.com/lspVW1hA5I
— Kamala HQ (@KamalaHQ) August 10, 2024
އެކަމާ ގުޅިގެން އިންސްޓަގްރާމްގައި ސެލީން އާންމުކުރި ބަޔާނެއްގައި ބުނީ ކެމްޕޭންގައި ލަވަ ބޭނުންކޮށްފައި ވަނީ އޭނަ އާއި އެ ލަވައިގެ ވެރިފަރާތް ކަމަށްވާ ސޮނީ މިއުޒިކް އެންޓަޓައިންމަންޓްގެ އެއްވެސް ހުއްދައެއް ނެތި ކަމަށެވެ. އަދި އެކަމަށް ނުރުހޭ ކަމަށް ބުނެފައިވެ އެވެ.
ސެލީންގެ ޕޯސްޓްގައި ވަނީ އެ ލަވަ އަކީ ހަމަ ސިޔާސީ ކެމްޕޭނަކަށް ބޭނުން ކުރަން އެކަށީގެންވާ ލަވައެއްތޯ ވެސް ސުވާލު އުފައްދައިފަ އެވެ.
ކުރިން ވެސް އެމެރިކާގެ ރައީސްކަން ކޮށްފައިވާ ޓްރަމްޕްގެ ކެމްޕޭން އިވެންޓްތަކުގައި މަޝްހޫރު އެކިއެކި ފަންނާނުންނާއި ބޭންޑްތަކުގެ ލަވަތައް ހުއްދަ ނެތި ބޭނުންކޮށްފައިވެ އެވެ. އޭގެ ތެރޭގައި ރޯލިން ސްޓޯނާއި ލިންކިން ޕާކާއި ޓޮމް ޕެކީ ފަދަ މީސްމީހުންގެ ލަވަތައް ބޭނުންކޮށްފައިވެ އެވެ.