ޤައުމަށް އަންނަ ތަރައްގީއާ އެއްވަރަށް މީހުންގެ ސިކުނޑިތައްވެސް ތަރައްގީވާން ޖެހޭ ކަމަށް ހޯމްލޭންޑް މިނިސްޓަރު އަލީ އިޙްސާން ވިދާޅުވެއްޖެއެވެ.
ފުވައްމުލަކުގައި މިހާރު ކުރިއަށް ގެންދާ "ރައްކާ" ރޯޑް ސޭފްޓީ ޕްރޮގްރާމްއަށް 10 އަހަރު ފުރުން ފާހަގަކުރުމަށް އެ ސިޓީގައި ރޭ ބޭއްވި ރަސްމިއްޔާތުގައި މިނިސްޓަރު ވިދާޅުވީ ޤާނޫނު ތަންފީޒުކޮށް، ކަންކަން ޙައްލުކުރަން އަޅާ ފިޔަވަޅަކީ ބައެއް ޙައްގު ނިގުޅައިގަތުން ކަމަށް ދެކޭ ވިސްނުން ވެސް ބަދަލުވާން ޖެހޭ ކަމަށެވެ. އަދި އެފަދަ މީހުންގެ ޙައްގު ހޯދައި ދޭން ކަމަށް ބުނެ އަޅާ ބައެއް ފިޔަވަޅުތަކުން، މުޖުތަމަޢުގެ ކަންކަން ގޯހުން ގޯހަށްދާ ތަން ފެނިފައިވާ ކަމަށް ވެސް ވިދާޅުވި އެވެ.
"އުސޫލުގެ ދަށުން ފުލުހުން ފިޔަވަޅު އެޅީމަ އެއީ ޙައްގު ނިގުޅައިގަނެވުނީ ކަމަށް ދެކޭ މީހުން އެބަތިބި. ޤާނޫނު ނަގަހައްޓާ ނަމަ ކޮންމެވެސް ވަރެއްގެ ދަތިކަމެއް އަންނާނެ،" އިހުސާން ވިދާޅުވި އެވެ. "ނަމަވެސް މީހަކު ޤާނޫނާ ޤަވައިދާ ޚިލާފުވީމަ ފިޔަވަޅު އަޅަނީ."
އޭނަ ވިދާޅުވީ މަގުމަތީގެ ރައްކާތެރިކަން ވެސް ދެމެހެއްޓޭނީ މުޖުތަމަޢުގެ ވިސްނުން މިކަމުގައި ބަދަލުކޮށްގެންކަން ކަމަށެވެ. އެހެންވެ ގައުމަށް އަންނަ އުމްރާނީ ތަރައްގީއާ އެއްވަރަށް ސިކުނޑިތައް ވެސް ތަރައްގީވުމަކީ މުހިއްމު ކަމެއް ކަމަށް މިނިސްޓަރު ވިދާޅުވި އެވެ.
އިހުސާން ވިދާޅުވީ ގާނޫނު ތަންފީޒުނުކޮށް ދޫކޮށްލާފައި އޮތްއިރު އެކަމުން ފައިދާތަކެއް ލިބުނު މީހުން އުޅޭ ކަމަށާއި ނަމަވެސް ޤާނޫނުތައް ތަންފީޒުކުރަން ފެށުމުން އެފަދަ މީހުންނަށް އުނދަގޫވެގެން އުޅޭ ކަމަށް ވެސް ފާހަގަކުރެއްވި އެވެ.