މާލެ އަށް ދިމާވެފައި އޮތް ބޯހިޔާވަހިކަމުގެ މައްސަލަ ހައްލުކުރެވޭނީ މާލެ ސިޓީ ކައުންސިލްގެ ބައިވެރިވުމާއެކީ ކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެ އެވެ.
ކައުންސިލް މެމްބަރުންނާއެކު މިއަދު ބޭއްވި ބައްދަލުވުމުގައި މާލޭގެ ކުރީގެ މޭޔަރުކަން ވެސް ކުރެއްވި ރައީސް
ވިދާޅުވީ ބޯހިޔާވަހިކަމުގެ މައްސަލަ އެންމެ ބޮޑަށް އޮތީ މާލޭގައި ކަމަށެވެ. އެހެންވެ އެ މައްސަލަ އަށް ސަރުކާރުން ޚާއްސަ އިސްކަމެއް ދެއްވާ ކަމަށާއި އެކަމަށް ހައްލު ހޯދަން ކުރާ މަސައްކަތަށް ކައުންސިލްގެ އެހީތެރިކަމާއި އެއްބާރުލުން ބޭނުން ވާނެ ކަމަށެވެ.
"މާލޭގެ މި މައްސަލަ ހައްލު ކުރެވޭނީ މާލޭގެ ރައްޔިތުން ހޮވާފައިވާ ކައުންސިލްގެ ބައިވެރިވުމާއެކުގައި،" ރައީސް ވިދާޅުވި އެވެ. "އެއީ އަޅުގަނޑު ބޭނުންވާ ގޮތަކީ ވެސް."
އެ މަނިކުފާނު ވިދާޅުވީ މިހާރު ފްލެޓު ދިނުމަށް ކަނޑައަޅާފައިވާ ލިސްޓު އިވެލުއޭޓުކުރުމުގައި ވެސް ކައުންސިލްގެ ކޮމިޓީއެއް ހިމެނުމަށް ވެސް ހައުސިން މިނިސްޓްރީ އަށް އަންގަވާފައިވާ ކަމަށެވެ.
ފަސް އަހަރުގެ ތެރޭގައި މާލޭގައި އުޅޭ ހުރިހާ އެންމެންނަށް ބޯހިޔާވަހިކަން ފޯރުކޮށް ދިނުމަކީ ރައީސްގެ ރިޔާސީ ވައުދެކެވެ.
އެގޮތުން ހުޅުމާލޭ ފަޅުން ހިއްކާ ބިމާއި، ގުޅީފަޅާއި ގިރާވަރުފަޅުން ހިއްކާ ބިންތަކުގެ މަސައްކަތް ނިމުމާއެކު އެ ތަންތަނުން ގޯތި ދެވޭނެ ކަމަށް ރައީސް ވިދާޅުވެފައިވެ އެވެ.