މި މަހުގެ ފަހުކޮޅު އޮލިމްޕަހުގައި އަޅުވަން ނިންމާފައިވާ ފިލްމު "ކަމަނާ" ޓިކެޓް ވިއްކަން ފެށުމާ އެކީ ލިބެމުން އަންނަ ބޮޑު ތަރުހީބާ ގުޅިގެން އެ ފިލްމުގެ ޝޯތައް ދަންވަރު ވެސް ދައްކާ ގޮތަށް ނިންމައިފި އެވެ.
އާންމުކޮށް އޮލިމްޕަހުގައި ފިލްމުތައް އަޅުވާ ގަޑިއަކީ ރޭގަނޑު 8:30 އެވެ.
ނަމަވެސް "ކަމަނާ" އަށް އޮތް ޑިމާންޑް ބޮޑުވެ، ގިނަ ބަޔަކަށް އޮލިމްޕަސް ސްކްރީނުގައި ފިލްމު ބަލާލަން ފުރުސަތު ފަހިކޮށް ދިނުމުގެ ގޮތުން ފިލްމު ޕްރީމިއާ ކުރަން ހަމަޖެހިފައިވާ ރޭ ކަމަށްވާ މި މަހުގެ 27 ވަނަ ދުވަހުގެ ރެއިން ފެށިގެން އަންނަ މަހުގެ 14 ހަމައަށް ކޮންމެ ހަފްތާއެއްގެ ވެސް ބުރާސްފައްޗާއި ހުކުރު ދުވަހުގެ ރޭ ދެ ޝޯ ދައްކަން ވަނީ ނިންމައިފަ އެވެ.
އެއީ 8:30 ގެ ޝޯގެ އިތުރުން 11:30 ގަ އެވެ.
މި ޝޯތަކުގެ ޓިކެޓް މާދަމާ އިން ފެށިގެން ވިއްކަން ފަށާނެ އެވެ. ޓިކެޓް ގަންނަން ބޭނުންވާ މީހުންނަށް މި ނަންބަރަށް 7458800 އަށް ވައިބަކޮށްގެން ޓިކެޓް ގަނެވޭނެ އެވެ.
"ކަމަނާ" ޕްރޮޑިއުސްކޮށްފައިވާ އަލީ ޝާނީޒްގެ ސެޓާން ސްޓޫޑިއޯ އިން ބުނީ ދަންވަރު ޝޯތަކެއް ބާއްވަން ނިންމި އެއް ސަބަބަކީ އޮލިމްޕަސް ލިބިފައި އޮތް މުއްދަތު ވެސް ކުރުކަމުން ކަމަށެވެ. އެގޮތުން ފިލްމު ދައްކަން ލިބުނީ 19 ދުވަހެވެ.
"އެހެންވެ ފިލްމަށް ޑިމާންޑް އޮތްވަރުން 19 ދުވަހުން ފިލްމް ބަލަން ބޭނުންވާ އެންމެނަށް ފިލްމު ބެލުމުގެ ފުރުސަތު ނުލިބިދާނެތީ ހަފުތާ ބަންދުގައި އިތުރު ޝޯވތަކެއް ދައްކަން ނިންމީ." އެ ސްޓޫޑިއޯ އިން ބުންޏެވެ.
މަހުދީ އަހުމަދުގެ ސްކްރީންޕްލޭއަކަށް ހުސައިން މުނައްވަރު ޑައިރެކްޓްކޮށްފައިވާ "ކަމަނާ" އަކީ ގެވެށިއަނިޔާ އަށް ބިނާކޮށް ހަދާފައިވާ ފިލްމެކެވެ. މީގެ ލީޑް ތަރިންނަކީ ޔޫސުފް ޝަފީއު (ޔޫއްޕެ) އާއި މަރިޔަމް އައްޒަގެ އިތުރުން އައިމިނަތު ރަޝްފާ (އާޝާ) އެވެ.