ނ. މާފަރު އެއާޕޯޓުގައި ޖެޓު ޖެއްސޭ ފެންވަރަށް ހެދުމގެ ގޮތުން އެ އެއާޕޯޓުގެ އޭޕްރަން ބޮޑުކުރުމުގެ މަޝްރޫއު އެމްޓީސީސީއާ މިއަދު ހަވާލުކޮށްފި އެވެ.
އެއްބަސްވުމުގައި އެ ކުންފުނީގެ ފަރާތުން ސޮއިކުރެއްވީ ސީއީއޯ އަބްދުﷲ ޒިޔާދެވެ. އަދި މޯލްޑިވިއަންގެ ފަރާތުން ސޮއިކުރެއްވީ އެ އައިލޭންޑް އޭވިއޭޝަން ސާވިސެސް (އައިއޭއެސް) ގެ މެނޭޖިން ޑިރެކްޓަރު އިބްރާހިމް އިޔާސެވެ.
އެމްޓީސީސީން ބުނީ މާފަރު އެއާޕޯޓްގެ ރަންވޭ ބޮޑުކުރުމުގެ މަޝްރޫއުގެ ދަށުން މިހާރު އޮތް 453 އަކަ މީޓަރުގެ ފަޔާ ރޯޑު ތަޅާލުމާއި، 18،660 އަކަ މީޓަރު ސަރަހައްދެއްގެ ވެލިގަނޑުގެ މަތީ ފަށަލަ ނަގައި، ސަބްބޭސް ތައްޔާރުކޮށް، ވެރިންގެ ކޯސްއެއް އެޅުމާއި، 4،047 އަކަ މީޓަރުގެ ސަރަހައްދެއް ގްރޭޑްކޮށް ކޮމްޕެކްޓްކުރުމުގެ މަސައްކަތް ކުރަން ހަމަޖެހިފައިވާ ކަމަށެވެ.
އެއާފީލްޑް ލައިޓިން ސިސްޓަމް ވެސް ހޮތަށް ހިމެނޭ އެ ކުންފުންޏާ ހަވާލުކުރީ 180 ދުވަސް ތެރޭގައި ނިންމާ ގޮތަށް 29.85 މިލިއަން ރުފިޔާއަށެވެ.
އެމްޓީސީސީން ބުނީ މަޝްރޫއުގެ ދަށުން މާފަރު އެއާޕޯޓް އޭޕްރަން ބޮޑުކުރުމުގެ މަސައްކަތް ނިމުމާއެކު، އެއާޕޯޓުގެ ހިދުމަތް އިތުރަށް ޒަމާނީވެ ފުރިހަމަވެގެން ދާނެ ކަމަށެވެ.
މާފަރު އެއާޕޯޓުގެ މަސައްކަތްތަކެއް ކުރިން ވެސް އެ ކުންފުނިން ކޮށްފައިވެ އެވެ. އެގޮތުން ރަންވޭގެ 650 މީޓަރު ދިގުކުރުމާއި ސްޓްރިޕް ފުޅާކުރުމަށްޓަކައި ބިން ހިއްކުމާއި ގޮނޑުދޮއް ހިމާޔަތްކުރުމާއި، މިހާރު ބޭނުންކުރާ ރަންވޭ ޕޭވްމަންޓް އަޕްގްރޭޑްކުރުން އެމްޓީސީސީން ކޮށްފައިވެ އެވެ.
މާފަރު އެއާޕޯޓް ހިންގަނީ އައިއޭއެސްއިންނެވެ.
ޑިސެމްބަރު 1، 2019 ގައި ހުޅުވި އެ އެއާޕޯޓަކީ ޔޫއޭއީގެ އަބޫދާބީ ފަންޑުން ފަންޑުކޮށްގެން ތަރައްގީކުރި އެއާޕޯޓެކެވެ.