ސަރުކާރުގައި ތިއްބެވީ ގާބިލު ބޭފުޅުން ކަމަށާއި އައްޑޫ ސިޓީގެ ތަރައްގީއަށް ހުރަހެއް ނެތް ކަމަށް އައްޑުގެ މޭޔަރު އަލީ ނިޒާރު ވިދާޅުވެއްޖެ އެވެ.
އައްޑޫގެ ބިން ހިއްކުމާއި، ގޮނޑުދޮށް ހިމާޔަތްކުރުމާއި، ހަންކެޑެ ބްރިޖު މަސައްކަތް ނިންމައި ސަރުކާރާ ހަވާލުކުރުމަށް މިއަދު ބޭއްވި ރަސްމިއްޔާތުގައި ވާހަކަދައްކަމުން ނިޒާރު ވިދާޅުވީ ރައީސް ޑރ. މުހައްމަދު މުއިއްޒުގެ ކެބިނެޓުގައި ތިއްބެވީ ގާބިލު، ކުޅަދާނެ ކެބިނެޓް މިނިސްޓަރުން ކަމަށާއި ސަރުކާރުގައި ހީވާގިކަމާއެކު މަސައްކަތް ކުރައްވާ ބޭފުޅުން ތިބިއިރު، ރައްޔިތުންގެ މަޖިލީހުގައި ތިއްބެވީ އައްޑޫގެ ތަރައްޤީއަށް ތާއަބަދު ވަކާލާތު ކުރެއްވި ބޭފުޅުން ކަމަށެވެ.
"އެއްވެސް ހުރަހެއް ނެތް. ތަރައްޤީ ލިބިގަތުމަށް, އެއްވެސް ހުރަހެއް ނެތް" ނިޒާރު ވިދާޅުވި އެވެ.
ނިޒާރު ވިދާޅުވީ އައްޑޫ އަށް ތަރައްގީ ގެންނަން އައްޑޫ ސިޓީ ކައުންސިލް އޮތީ މި ހުރިހާ ބޭފުޅުންނަށް ވުރެ ވެސް ކުރީގައި ކަމަށާއި ކުރަންޖެހޭ ހުރިހާ ކަމެއް ކުރަން ތައްޔާރަށް ތިބި ކަމަށެވެ. އައްޑޫގައި ހިއްކާފައި ހުރި ބިންތަކުގެ ލޭންޑް ޔޫސް ޕްލޭންގެ ކަންކަން ކުރިއަށްދަނީ ސަރުކާރާ ގުޅިގެން ރައްޔިތުންގެ ޚިޔާލާއި މަޝްވަރާގެ މަތިން ކަމަށާއި އެ ބިންތައް ތަރައްގީ ވެގެންދާނީ ވެސް އެ ހިޔާލާއެކު ކަމަށް މޭޔަރު ވިދާޅުވި އެވެ.
މަސައްކަތް ނިންމައި ސަރުކާރާއި މިއަދު ހަވާލުކުރި މަޝްރޫއުތަކަކީ އިންޑިއާގެ ލައިން އޮފް ކްރެޑިޓް ފެސިލިޓީގެ ދަށުން ކުރިއަށްގެންދިޔަ މަޝްރޫއުތަކެކެވެ.