އިދިކޮޅު އެމްޑީޕީއަށް ނިސްބަތްވާ ހަތަރު މެންބަރެއްގެ ނަން އިއްވުމަށްފަހު މަޖިލީހުގެ ޖަލްސާ މެދުކަނޑާލައިފިއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ހައުސިން މިނިސްޓަރު ޑރ. އަލީ ހައިދަރާ ސުވާލު ކުރުމަށް ލިބުނު ފުރުސަތުގައި މެންބަރުން ވަނީ ކުރީ ސަރުކާރުން މާލެ ސަރަހައްދުން ދީފައިވާ ގޯއްޗާއި ފްލެޓްތަކާ ގުޅޭގޮތުން ސުވާލު ކޮށްފައެވެ. އެހެންނަމަވެސް ބައެއް ސުވާލުތަކަށް މިނިސްޓަރު ހައިދަރު ދެއްވި ޖަވާބުތަކާމެދު އެމްޑީޕީ މެންބަރުން ވަނީ ހިތްހަމަ ނުޖެހުން ފާޅުކޮށްފައެވެ.
އެގޮތުން ނިޒާމީ ނުކުތާނަގާ އެމްޑީޕީގެ މެންބަރުން އެކަން ފާހަގަކުރުމުން ރިޔާސަތުން ވަނީ ނިޒާމީ ނުކުތާ ބަލައިގަންނަ ކަމަށް ބުނެފައެވެ. އެ ނިންމުމާއެކު އެމްޑީޕީގެ ބައެއް މެންބަރުން ވަނީ މަޖިލީހުގެ ތަޅުމުގައި އަޑުގަދަކުރަން ފަށާފައެވެ.
މަޖިލީހުގައި އަޑުގަދަ ކުރުމުން އެމްޑީޕީގެ 4 މެންބަރުންގެ ނަން އިއްވާފައިވެއެވެ. ނަން އިއްވާފައިވަނީ ވައިކަރަދޫ ދާއިރާގެ މެންބަރު ހުސައިން ޒިޔާދު، ހިތަދޫ ދެކުނު ދާއިރާގެ މެންބަރު އިބްރާޙިމް ނާޒިލް، ކެންދޫ ދާއިރާ މެންބަރު މައުރޫފް ޒާކިރް އަދި ކެޔޮދޫ ދާއިރާގެ މެންބަރު މުހައްމަދު ނިއުޝާދްގެއެވެ.
މި މެންބަރުންގެ ނަން އިއްވި އިރު މަޖިލީހުގެ ރިޔާސަތު މޭޒު ކައިރިއަށް އެއްވެ މެންބަރުން ދިޔައީ ނުރުހުން ފާޅުކުރަމުންނެވެ. އެކަމާ ގުޅިގެން މަޖިލީހުގެ ޖަލްސާ ވަނީ މެދުކަނޑާލާފައެވެ.