ހުޅުމާލެ ފޭސް 2 އިން ހަވާލުކުރަންޖެހޭ ގޯތިތައް އޮކްޓޫބަރު މަހުގެ ނިޔަލަށް ހަވާލުކޮށް ނިމޭނެ ކަމަށާއި، ފޭސް 3 އިން ހަވާލުކުރަންޖެހޭ ގޯތިތައް ނޮވެމްބަރުގައި ދޭން ފޭށޭނެ ކަމަށް ހައުސިން މިނިސްޓަރު ޑރ. އަލީ ހައިދަރު ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް ވަނީ ކުރީ ސަރުކާރުން މާލޭ މީހުންނަށް
ބޯހިޔާވަހިކަން ފޯރުކޮށްދިނުމުގެ ގޮތުން ދީފައިވާ ގޯތިތައް އޭގެ ވެރިފަރާތްތަކާ ހަވާލުކުރެވޭނީ ކިހާ ހިސާބަކުންތޯ ސުވާލުކޮށްފައެވެ. އެސުވާލަށް ޖަވާބު ދެއްވަމުން މިނިސްޓަރު ހައިދަރު ވިދާޅުވީ ކުރީ ސަރުކާރުން ދީފައިހުރި ތަންތަން ހުރީ ކަނޑު އަދި ފަޅުގައި ކަމަށާއި ކަނޑުންނާއި ފަޅުން ދީފައި ހުންނަ ތަންތަނަށް ގޯތި ނުކިޔާނެ ކަމަށެވެ.
ހުޅުމާލެ ފޭސް 2 އިން ދޫކޮށްފައިހުރި ގޯތިތައް ދޫކޮށްފައިވަނީ އެއްވެސް ތަރުތީބެއްނެތި މަގުތަކާއި، ކަރަންޓު ނަރުތައް މަތިން ކަމަށް ވިދާޅުވިއެވެ. އަދި ފޭސް 2 އިން ދޭންޖެހޭ 1407 ގޯތީގެެ ތެރެއިން، ބިން ސާފުކޮށް 623 ގޯތި ހަވާލުކޮށްފައިވާ ކަމަށް ހައިދަރު ވިދާޅުވިއެވެ. އަދި ފޭސް 2 ގައި ހުރި ހުރިހާ ގޯއްޗެއް އޮކްޓޯބަރުގެ ނިޔަލަށް ހަވާލުކުރެވޭނެ ކަމަށްވެސް ވިދާޅުވިއެވެ.
މީގެއިތުރުން ހުޅުމާލެ ފޭސް 3 އިން 699 ގޯތި ދީފައިވާއިރު އެތަންތަން ހުރީ ފަޅުގައި ކަމަށް މިިނިސްޓަރު ހައިދަރު ވިދާޅުވިއެވެ. ފަޅުން ބައެއް މީހެއްގެ ނަންމަތީ ރަޖިސްޓްރީ ކުރެވޭގޮތެއް އަދި ނެތްކަން ފާހަގަކޮށް މިނިސްޓަރު ހައިދަރު ވިދާޅުވީ ނުހިއްކާ ތަނަކުން ގޯތި ދިނުމަކީ ޒިންމާދާރު ސަރުކާރަކުން ކަން ކުރާނެ ގޮތެއް ނޫން ކަމަށެވެ.
ރައީސް މުއިއްޒު ބޭނުންވަނީ ޒިންމާދާރުކަމާއެކު ގޯތި ބަހަން ކަމަށް ވިދާޅުވެ ހައިދަރު ވިދާޅުވީ ގޯތި ލިބުނު 699 ފަރާތަށް ގޯތި ހަވާލުކުރާނީ ބިން ހިއްކުމަށްފަހު ކަމަށެވެ. އަދި ލަފާކުރެވެނީ މި އަހަރު ނޮވެމްބަރު މަހު ގޯތިތައް ހަވާލުކުރުމުގެ މަސައްކަތް ފެށޭނެ ކަމަށް މިނިސްޓަރު ހައިދަރު ވިދާޅުވިއެވެ.