ރާއްޖެ އަށް މިހާރު ކުރަމުން އަންނަ ވިއްސާރައިގައި އައްޑު އަށް ބައެއް ގެއްލުންތައް ލިބިއްޖެ އެވެ.
އެގޮތުން އެކި އަވަށްތަކުުގެ އެކި ހިސާބުތަކުން ގަހާއި ރުއް ވެއްޓިފައިވެ އެވެ. ރޭ ފޭދޫ ގެއެެއްގެ ފުރާޅު މައްޗަށް ބަނބުކެޔޮ ގަހެއް ވެސް ވެސް ވެއްޓިފައިވެ އެވެ. އެ ގޭގެ ފުރާޅުމަތިން ގަސް ނަގައި ލިބުނު ގެއްލުންތައް ވަގުތީ ގޮތުން މަރާމާތުކޮށްފައިވާ އިރު، އެ ހާދިސާގައި އެއްވެސް މީހަކަށް ގެއްލުމެއް ލިބިފައެއް ނުވެ އެވެ.
ވައި ގަދަވުމުގެ ސަބަބުން އައްޑޫގެ އަވަށްތަކުގެ އެކި ހިސާބުތަކުން މަގުމައްޗާއި ރުކާއި ގަސް ވެއްޓިފައިވާތީ އެ ތަކެތި ނެގުމުގެ މަސައްކަތްތައް އަވަށު އޮފީސްތަކުން އަންނަނީ ކުރަމުންނެވެ.
މި މަސައްކަތުގައި އަވަށު އޮފީސްތަކުގެ މުވައްޒަފުންނާއި ފުލުހުންނާއި ސިފައިންގެ އެހީތެރިކަން ވެސް އަންނަނީ ލިބެމުންނެވެ.
ވައި ގަދަވުމުގެ ސަބަބުން ރޭ ހިތަދޫގެ މަގެއްގެ މަތީގައި ހުރި މަގުބައްތި ހޮޅިދަނޑިއެއް ވެސް ވެއްޓިފައިވެ އެވެ.
މޫސުމާ ބެހޭ އިދާރާ އިން މިއަދު އޮތީ މުޅި ރާއްޖެ އަށް ވައިޓް އެލާޓް ނެރެފަ އެވެ.
އެގޮތުން ހެނދުނު 9:00 އިން ފެށިގެން މެންދުރު ފަހު 3:00 އާ ހަމައަށް އެލާޓް ނެރެފައިވާ އިރު، އެ ވަގުތުގެ ތެރޭގައި ބޯކޮށް ވާރޭ ވެހުމާ އެކީ ގުގުރައި ވިލާގަނޑުގައި ގަޑިއަކު 19-24 މޭލާ ދެމެދުގެ ބާރު މިނުގައި ވައި ޖެހި، ވިލާގަނޑުގައި ގަޑިއަކު 45 މޭލަށް ވައި ގަދަވެ، ކަނޑުތައް ވެސް ގަދަވާނެ ކަމަށް ލަފާކޮށްފައިވެ އެވެ.
މި ހަފުތާ އެކީގައި ކަހަލަ ގޮތަކަށް މޫސުން ގޯސްވާނެތީ ކަމާބެހޭ އިދާރާތަކުން ވަނީ ލިބިދާނެ ގެއްލުންތަކުން ރައްކާތެރިވުމަށް ދުރާލައި ފިޔަވަަޅުތައް އެޅުމަށް ވެސް އިލްތިމާސްކޮށްފަ އެވެ.