އައްޑޫ ލިންކް ރޯޑް ޒަމާނާ އެއްގޮތަށް މަރާމާތުކޮށް، އައްޑޫ މަގުތައް ހެދުމުގެ ދެވަނަ ފިޔަވައްސެއް ކުރިއަށް ގެންދާނެ ކަމަށް ކޮންސްޓްރަކްޝަން މިނިސްޓަރު ޑރ. މުހައްމަދު މުއްތަލިބް ވިދާޅުވެއްޖެ އެވެ.
އިއްުޔެ އައްޑޫގައި ހުންނަވައިގެން ދައުލަތުގެ މީޑިއާ، ޕީއެސްއެމަށް ދެއްވި އިންޓަވިއުއެއްގައި މިނިސްޓަރު ވިދާޅުވީ އިންޑިއާ ސަރުކާރުގެ އެހީގައި، އެ ގައުމުގެ އެފްކޮންސް އިންފްރާސްޓްރަކްޗާ އިން އައްޑޫގައި މަގުތައް ހަދަން 2021 ގައި ފެށި މަޝްރޫއުގެ
ބޮޑު ބައެއް ނިމިފައިވާ ކަމަށެވެ.
މުއްތަލިބް ވިދާޅުވި ގޮތުގައި މި މަޝްރޫއު މިއަހަރުގެ ތެރޭގައި މުޅިން އެއްކޮށް ނިންމައި ލެވޭނެ އެވެ.
މިނިސްޓަރު ވިދާޅުވީ ސަރުކާރުން މިހާތު މަސައްކަތް ކުރަމުން އަންނަނީ އައްޑޫގެ މަގުހެދުމުގެ ދެވަނަ ފިޔަވައްސެއް ކުރިއަށް ގެންދިއުމަށެވެ. އެގޮތުން އައްޑޫ ލިންކް ރޯޑުގެ މަސައްކަތަށް ވަރަށް ބޮޑު އިސްކަމެއް ދެއްވާނެ ކަމަށް ވިދާޅުވި އެވެ.
“ފޭސް ޓޫއެއް އަންނަން ޖެހޭ މަގު ހެދުމަށް. ބާކީ ހުރި މަގުތައް ހެދެން ޖެހޭ. ހަމައެއާއެކު އައްޑޫގެ ލިންކް ރޯޑުގެ މަސައްކަތަކީ ކޮންމެހެން ކުރަން ޖެހޭ ކަމެއް،" މިނިސްޓަރު ވިދާޅުވި އެވެ. "ލިންކް ރޯޑަކީ ވިހި އަހަރަށް ވުރެ ގިނަ ދުވަސްވީ އަދި މިހާރު ވަރަށް ބޮޑަށް ހަލާކުވެފައިވާ މަގެއް."
މުއްތަލިބް ވިދާޅުވީ އައްޑޫގެ ތަރައްގީއަށްޓަކައި ލިންކް ރޯޑު ފުޅާކުރެވި ޒަމާނީ ފެންވަރަށް އެ މަގު އަލުން ހެދުމަކީ ވަރަށް މުހިންމު ކަމެއް ކަމަށެވެ.
"އެހެންވީމަ ސަރުކާރުން ވަރަށް ބޮޑު އިސްކަމެއްދޭނެ ލިންކް ރޯޑު އަލުން ތަރައްޤީކުރުމާ އެއްކޮށް އައްޑޫގެ ބާކީ ހުރި މަގުތަކުގެ މަަސައްކަތްތައް ވެސް ކުރިއަށް ގެންދިއުމަށް." މިނިސްޓަރު ވިދާޅުވި އެވެ.
އިއްޔެ އައްޑޫ މޭޔަރު އަލީ ނިޒާރު ވެސް ވަނީ މި ސަރުކާރުން މަގު ހެދުމުގެ ދެވަނަ ފިޔަވައްސެއް ކުރިއަށް ގެންގޮސް ދެއްވަން އެދިވަޑައިގެންފަ އެވެ.
އައްޑޫ މަގު ހެދުމުގެ މަޝްރޫއުގެ ތެރެއިން ވަނީ ހަންކެޑައިގައި އާ ބްރިޖެއް ވެސް ހަދައިފަ އެވެ.