ޕީއެންސީން ރައްޔިތުންގެ ހައްގުތައް ކަށަވަރު ކޮށްނުދޭނެކަން ކަށަވަރުވާ ކަމަށް ރައްޔިތުންގެ މަޖިލީހުގެ މައިނޯރިޓީ ލީޑަރު ހިތަދޫ އުތުރު ދާއިރާގެ މެންބަރު އިބްރާހީމް ނާޒިލް ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ހައުސިން މިނިސްޓަރު ޑރ. އަލީ ހައިދަރާ ސުވާލު ކުރުމަށް ލިބުނު ފުރުސަތުގައި މެންބަރުން ވަނީ ކުރީ ސަރުކާރުން މާލެ ސަރަހައްދުން ދީފައިވާ ގޯއްޗާއި ފްލެޓްތަކާ ގުޅޭގޮތުން ސުވާލު ކޮށްފައެވެ. އެހެންނަމަވެސް ބައެއް ސުވާލުތަކަށް މިނިސްޓަރު ހައިދަރު ދެއްވި ޖަވާބުތަކާމެދު އެމްޑީޕީ މެންބަރުން ވަނީ ހިތްހަމަ ނުޖެހުން ފާޅުކޮށްފައެވެ.
އެގޮތުން ނިޒާމީ ނުކުތާނަގާ އެމްޑީޕީގެ މެންބަރުން އެކަން ފާހަގަކުރުމުން ރިޔާސަތުން ވަނީ ނިޒާމީ ނުކުތާ ބަލައިގަންނަ ކަމަށް ބުނެފައެވެ. އެ ނިންމުމާއެކު އެމްޑީޕީގެ ބައެއް މެންބަރުން ވަނީ މަޖިލީހުގެ ތަޅުމުގައި އަޑުގަދަކުރަން ފަށާފައެވެ. އަދި ރިޔާސަތުން ވަނީ އެމްޑީޕީގެ ހަތަރު މެންބަރެއްގެ ނަން އިއްވާފައެވެ.
މިކަމާ ގުޅިގެން އެމްޑީޕީން މިއަދު ކުރިއަށް ގެންދިޔަ ނޫސްވެރިންގެ ބައްދަލުވުމުގައި ނާޒިލް ވިދާޅުވީ އެމްޑީޕީން އަބަދުވެސް ތިބޭނީ ރައްޔިތުންނާއި އެކު ކަމަށެވެ.
ނާޒިލް ވިދާޅުވީ މެންބަރުންގެ ސުވާލުތަކަށް މިނިސްޓަރު ހައިދަރު ޖަވާބު ނުދެއްވުމުން ދެން ހިނގާދިޔަ ކަންކަމުގައި ރިޔާސަތުން އަމަލުކުރިގޮތުން ޕީއެންސީ ސުޕަ މެޖޯރިޓީއާއެކު ރައްޔިތުންގެ ހައްގުތައް ކަށަވަރުކޮށްނުދޭކަން ސާފުވާ ކަމަށެވެ.
މިއަދުގެ މަޖިލީހުގައި ނަން އިއްވާފައިވަނީ އެމްޑީޕީއަށް ނިސްބަތްވާ ވައިކަރަދޫ ދާއިރާގެ މެންބަރު ހުސައިން ޒިޔާދު، ހިތަދޫ ދެކުނު ދާއިރާގެ މެންބަރު އިބްރާޙިމް ނާޒިލް، ކެންދޫ ދާއިރާ މެންބަރު މައުރޫފް ޒާކިރް އަދި ކެޔޮދޫ ދާއިރާގެ މެންބަރު މުހައްމަދު ނިއުޝާދްގެއެވެ.