ފަޚުރުވެރި ރާއްޖެއެއް ބިނާކުރެވޭނީ ގައުމީ މަސައްކަތްތަކުގައި ޒުވާނުންގެ ހިއްސާ އިތުރުކޮށްގެން ކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެ އެވެ.
މިއަދު ފާހަގަ ކުރަމުން އަންނަ ޒުވާނުންގެ ދުވަހާ ގުޅިގެން ސޯޝަލް މީޑިއާ ޕޯސްޓެެއްގައި އެ މަނިކުފާނު ވިދާޅުވީ ފަހުރުވެރި ރާއްޖެއެއް ބިނާ ކުރެވޭނީ ގައުމީ ކޮންމެ މަސައްކަތެއްގައި ޒުވާނުންގެ އެއްބާރުލުމާއި ހިއްސާ އިތުރުކޮށްގެން ކަމަށެވެ.
ޒުވާނުންގެ ދުވަސް މިއަދު ފާހަގަ ކުރަމުން އަންނަ އިރު، ރައީސް ވަނީ "ދިވެހި ޒުވާނުންގެ ގައުމީ ލަފާ ދޭ ކޮމިޓީ" ވެސް އިފުތިތާހުކޮށް ދެއްވައިފަ އެވެ.
އޭގެ މަގުސަދަކީ ސަރުކާރުގެ މެނިފެސްޓޯ އާއި މުހިންމު ސިޔާސަތުތައް ތަންފީޒުކުރުމުގައި، ޒުވާނުންގެ ޚިޔާލާއި މަޝްވަރާ ހޯދައި، އެފަދަ ކަންކަމުގައި ކުރިއަށް ދާންވީ ގޮތްތަކާ ގުޅޭ ގޮތުން ރައީސަށް ލަފާ އެރުވުމާއި، ތަފާތު އެކި ދާއިރާތަކުގައި ޒުވާނުންގެ ކުރިއެރުމަށް ހުރި ހުރަސްތަކާއި ގޮންޖެހުންތައް ދެނެގަނެ، އެކަންކަމާމެދު ފުޅާ ދާއިރާއެއްގައި މަޝްވަރާކޮށް، ޤައުމީ ފެންވަރުގަ އާއި ސަރަހައްދީ ފެންވަރުގައި، ހައްލު ހޯދުމަށް، މަސައްކަތް ކުރެވޭނެ ގޮތްތަކާ ގުޅޭގޮތުން ރައީސްއަށް ލަފާއެރުވުމެވެ.
"ދިވެހި ޒުވާނުންގެ ގައުމީ ލަފާ ދޭ ކޮމިޓީ" ގެ ބޯޑުގައި ތިއްބަވާނީ 15 މެންބަރުންނެވެ. ބޯގެ ސެކްރެޓޭރިއޭޓް ބަލަހައްޓާނީ ޔޫތު މިނިސްޓްރީންނެވެ.
ސަރުކާރުން ވަނީ ޒުވާނުންނާ ގުޅޭ ކަންކަން ނިންމުމަށްޓަކައި ޕްރެޒިޑެންޝަލް ޔޫތު އެޑްވައިޒާސް ކައުންސިލެއް ވެސް އުފައްދަން ނިންމައިފައެވެ. އެ ކައުންސިލަކީ ޒުވާނުންގެ ބައިވެރިވުން އިތުރުކުރުމަށާއި، މަޝްވަރާ ނިނމުންތައް ނިންމާ އިރު ޒުވާނުން ދެކޭގޮތް ހާމަ ކުރުމަށް މަގުފަހި ކުރުމުގެ ގޮތުން އެކުލަވާލާ ކައުންސިލެކެވެ.