ރާއްޖޭގެ ޓޫރިޒަމް ޕްރޮމޯޓްކުރުމަށްޓަކައި އިޓަލީ އާއި ރަޝިއާގައި މި އަހަރު ރޯޑްޝޯތަކެއް ބާއްވަން ނިންމާފައިވާ ކަމަށް ޓޫރިޒަމް މިނިސްޓަރު އިބްރާހީމް ފައިސަލް ވިދާޅުވެއްޖެ އެވެ.
މިނިސްޓަރު ވިދާޅުވީ އެކަމާ ގުޅޭ ތައްޔާރީތައް ކަމާބެހޭ ފަރާތްތަކާ އެކީ މިހާރު ކުރިއަށްދާ ކަމަށެވެ. ނަމަވެސް ރޯޑްޝޯތައް ބާއްވާނެ އިރެއް ހާމައެއްނުކުރައްވަ އެވެ.
އިޓަލީ އާއި ރަޝިއާ އަކީ މިހާރު ވެސް ރާއްޖެ އަށް އެންމެ ޓޫރިސްޓުން އަންނަ 10 ގައުމުގެ ތެރޭގައި ހިމެނޭ ދެ ގައުމެވެ. އަދި ރަޝިއާ އަކީ މިހާރު ދެވަނަ އަށް އެންމެ ގިނަ ޓޫރިސްޓުން އަންނަ ގައުމެވެ.
ޓޫރިސްޓް އެރައިވަލްސްގެ އެންމެ ފަހުގެ ތަފާސްހިސާބުތައް ދައްކާ ގޮތުން މި މަހުގެ 11 އާ ހަމައަށް ރަޝިއާ އިން އައި ޓޫރިސްޓުންގެ އަދަދަކީ 134،998 އެވެ. އަދި މިހާރު ހަތަރު ވަނައިގައި އޮތް އިޓަލީން 92،109 ޓޫރިސްޓުން އައިސްފައިވެ އެވެ.
ރާއްޖެ ޕްރޮމޯޓްކުރަން އިޓަލީ އާއި ރަޝިއާގައި ރޯޑްޝޯތަކެއް ބާއްވަން ނިންމި އިރު، ދާދި ފަހުން ވަނީ އިންޑިއާގައި ވެސް ރޯޑްޝޯތަކެއް ބާއްވައިފަ އެވެ.
މި މަހުގެ 11 އާ ހަމައަށް ރާއްޖެ އަށް ޖުމްލަ 1254646 ޓޫރިސްޓުން ޒިޔާރަތްކޮށްފައިވާ އިރު، އަމާޒަކީ އަހަރު ނިމުމުގެ ކުރިން 2 މިލިއަން ޓޫރިސްޓުން ގެނައުމެވެ.
މިހާރު ރާއްޖެ އަށް އެންމެ ގިނަ ޓޫރިސްޓުން އަންނަ 10 ގައުމަކީ ޗައިނާ، ރަޝިއާ، އިނގިރޭސިވިލާތް، އިޓަލީ، ޖަރުމަން، އިންޑިއާ، އެމެރިކާ، ފްރާންސް، ސްވިޓްޒަލޭންޑް އަދި ސްޕެއިނެވެ.