އަންނަ މަހު އޮލިމްޕަހަށް ގެންނަން ނިންމާފައިވާ "ރޮބޯމޭން: ދަ މޫވީ" ގެ ޓީޒާއެއް ދައްކާލައިފި އެވެ.
ޓީޒާ އިން ފެންނަ ގޮތުގައި މިއީ ރޮބޯމޭންގެ ފަރާތުން ހިތްވަރު ހޯދައިގެން ޑާންސް ކޮމްޕެޓިޝަނެއް ކުރަން ކުދިންތަކެއް ކުރާ މަސައްކަތްތަކެއް ދައްކުވައު ދޭނެ ފިލްމެކެވެ.
ދިވެހިންގެ ތެރޭގައި ހާއްސަކޮށް ކުޑަކުދިންގެ މެދުގައި ވަރަށް މަގުބޫލު ކެރެކްޓާއެއް ކަމަށްވާ "ރޮބޯމޭން" އާ ގުޅުވައިގެން ގެނެސްދޭ "ރޮބޯމޭން: ދަ މޫވީ" އަކީ މަހުދީ އަހުމަދު ސްކްރީންޕްލޭއަކަށް މުހައްމަދު މުންތަސިރު (މުންކޮ) އާއި މަޝްހޫރު ކެމެރާމަން އިބްރާހީމް ވިޝާމް (ކަނޑި) ޑައިރެކްޓްކޮށްފައިވާ ފިލްމެކެވެ.
އަންނަ މަހުގެ 26 ގައި ޕްރީމިއާކުރަން ހަމަޖެހިފައިވާ "ރޮބޯމޭން: މޫވީ" ގެ ކާސްޓުން މަޝްހޫރު ތަރިން ކަމަށްވާ މަރިޔަމް އައްޒަ އާއި ރަވީ ފާރޫގް ވެސް ފެންނާނެ އެވެ.