ބޮލީވުޑްގެ މަޝްހޫރު ޑައިރެކްޓަރު ކަރަން ޖޯހަރް މުޅިން އަލަށް ޑައިރެކްޓްކުރަން ހަމަޖެހިފައިވާ އެކްޝަން ފިލްމުގެ ބަތަލަކަށް ނަގަން ހަމަޖެހިފައި ވަނީ ސިދާތު މަލްއުތުރާ ކަމަށް ރިޕޯޓްތައް ބުނެފި އެވެ.
ބޮލީވުޑް ހަންގާމާ އިން މިއަދު ބުނީ އެ ފިލްމުގެ ވާހަކަ ވެސް ސިދާތަށް މިހާރު ނެރޭޓްކޮށް ދީފައިވާ ކަމަށާއި ލަސްތަކެއް ނުވެ ފިލްމު ރަސްމީކޮށް އިއުލާން ކުރާނެ ކަމަށް ބެލެވޭ ކަމަށެވެ. ހަންގާމާ އިން ބުނި ގޮތުގައި ފިލްމުގެ ޝޫޓިން ފަށާނީ އަންނަ އަހަރު އެވެ.
މިހާތަނަށް ލޯބީގެ ރީތި އަދި އެހާމެ ކާމިޔާބު ފިލްމުތަކެއް ގެނެސްދިން ކަރަން، އެކްޝަން ފިލްމެއް ޑައިރެކްޓްކުރަން ނިންމިކަން އިއުލާންކުރީ އޭނަގެ 50 ވަނަ އުފަން ދުވަހާ ދިމާކޮށް 2022 ގަ އެވެ. އޭރު އޭނަ ގެންދިޔައީ މިދިޔަ އަހަރު ރިލީޒްކުރި "ރޮކީ އޯރް ރާނީ ކީ ޕްރޭމް ކަހާނީ" ގެ މަސައްކަތް ވެސް ކުރަމުންނެވެ.
އޭރު ކަރަން ބުނެފައި ވަނީ އެ ފިލްމަށް ފަހު ދެން އޭނަ ހަދާނީ މި އެކްޝަން ފިލްމު ކަމަށެވެ. ނަމަވެސް މިހާތަނަށް އެއާ ބެހޭ އިތުރު އެއްވެސް ތަފުސީލެއް ނުދެ އެވެ. ނަމަވެސް މި އަހަރު މެއި 25 ގައި ފާހަގަކުރި އޭނަގެ 52 ވަނަ އުފަން ދިމާކޮށް އަނެއްކާ ވެސް މި ފިލްމަށް ތައްޔާރުވަމުން އަންނަ ވާހަކަ ހިއްސާކޮށްފައިވެ އެވެ.
މި ފިލްމުގެ ބަތަލަށް ސިދާތު ގެންނަން އުޅޭ ކަމަށް ވާހަކަ ދެކެވެން ފެށި އިރު، ބައެއް މީޑިއާތަކުން ރިޕޯޓްކޮށްފައިވާ މިއީ ދެ ބަތަލުން ހިމެނޭނެ ފިލްމެކެވެ. އެގޮތުން ވަރޫން ދަވަނާއި ޓައިގާ ޝްރޮފް ފިލްމުން ފެންނާނެ ކަމަށް ބުނެފައިވެ އެވެ.
ނަމަވެސް އެ ވާހަކަ މިހާރު މާޒީ އަށް ގޮސް މިހާރު ސިދާތަކީ ކަރަންގެ ފުރަތަމަ ހޮވުމަށް ވެދާނެ ކަމަށް ވަނީ ބެލެވެން ފަށައިފަ އެވެ. ސިދާތު ބޮލީވުޑަށް ނެރުނީ ވެސް ކަރަން އެވެ. އެއީ އޭނަ ޑައިރެކްޓްކޮށް، 2012 ގައި ގެނެސްދިން "ސްޓޫޑެންޓް އޮފް ދޮ އިޔާ" އިންނެވެ.
އެ ފިލްމަކީ ވަރޫން އާއި އާލިއާ ބަޓް ވެސް ތައާރަފުވި ފިލްމެވެ.
ކަރަން އާ ފިލްމެއް ހަދަން ތައްޔާރުވާތީ އޭނަ އަނެއްކާ ވެސް އަލުން ޝާހްރުކް ޚާނާއި ކާޖޮލް ހިމަނައިގެން ފިލްމެއް ހަދަން ވެސް ވަރަށް ފޭނުން ޑިމާންޑް ކުރަމުން އަންނަކަން ފާހަގަކޮށްލެވެ. ކަރަން ޑައިރެކްޝަނަށް ނުކުތީ އެ ދެ ތަރިންނާ އެކީ ގެނެސްދިން 1998 ގެ "ކުޗް ކުޗް ހޯތާ ހޭ" އިންނެވެ.
އަލަތު އެކްޝަން ފިލްމު ވާނީ އޭނަ ޑައިރެކްޓްކުރާ 8 ވަނަ ފިލްމަށެވެ. އޭނަގެ އެންމެ ފަހުގެ ފިލްމު "ރޮކީ އޯރް ރާނީ ކީ ޕްރޭމް ކަހާނީ" ގެ ތަރިންނަކީ އާލިއާ އާއި ރަންވީރު ސިންގް އެވެ.