ފޮރިން މިނިސްޓަރު މޫސާ ޒަމީރު، ބަހްރެއިންގެ ވަލީއަހުދާއި ބައްދަލުކުރައްވައި، އެގައުމުގެ ރަސްގެފާނަށް އެރުވުމަށް ރައީސް ޑރ. މުހައްމަދު މުއިއްޒު ފޮނުއްވި ހާއްސަ ސިޓީފުޅެއް ހަވާލުކުރައްވައިފި އެވެ.
މިނިސްޓަރު ޒަމީރު "އެކްސް"ގައި ކުރެއްވި ޕޯސްޓެއްގައި ވިދާޅުވީ ބަހްރެއިންގެ ޑެޕިއުޓީ ސުޕްރީމް ކޮމާންޑަރު އަދި ބޮޑުވަޒީރު ވަލީއަހުދު ސަލްމާން ބިން ހަމަދު އަލް ޚަލީފާއާ ބައްދަލުކުރުމުގެ ޝަރަފު މިއަދު ލިބުނު ކަމަށެވެ.
އަދި ބަހްރެއިންގެ ރަސްގެފާނު ހަމަދު ބިން އީސާ އަލް ޚަލީފާއަށް ރައްދުކޮށްދެއްވުމަށް ރައީސް ޑރ މުހައްމަދު މުއިއްޒުގެ ދެއްވި ސިޓީފުޅު ވަލީއަހުދާއި ހަވާލުކުރެއްވި ކަމަށް ޒަމީރު ވިދާޅުވި އެވެ.
މީގެއިތުރުން ރާއްޖެއާއި ބަހުރައިނާއި ދެމެދުގައި އޮތް ގާތް ރަޙްމަތްތެރިކަމުގެ ގުޅުން އިތުރަށް ބަދަހިކުރެއްވުމަށް ދިވެހި ސަރުކާރުން އަބަދުވެސް މަސައްކަތް ކުރައްވާނެކަމުގެ ޔަޤީންކަން ދެއްވި ކަމަށްވެސް ޒަމީރު ވިދާޅުވި އެވެ.
ޒަމީރު ބަހްރެއިނަށް ވަޑައިގެންނެވީ ބަހްރެއިންގެ ފޮރިން މިނިސްޓަރު ޑރ. އަބްދުލްއާތިފް ބިން ރާޝިދު އަލް ޒަޔާނީގެ ދައުވަތަކަށެވެ.