ރައްޔިތުން އޮބެހެއްޓުމުގެ ސަގާފަތް ފުޅާވަމުންދާ ކަމަށް ދަ ޑިމޮކްރެޓްސް އިން ބުނެފި އެވެ.
ޑިމޮކްރެޓްސް އިން މިހެން ބުނެފައިވަނީ 2004 ވަނަ އަހަރުގެ އޮގަސްޓް 12 އަދި 13 ގެ ހާދިސާ ހަނދާންކުރުމުގެ ގޮތުން ނެރުނު ނޫސްބަޔާނެއްގަ އެވެ.
އެ ބަޔާނުގައި ބުނެފައިވަނީ އަނިޔާއާއި ބިރުވެރިކަމުގެ ތެރެއިން އޭރު ރައްޔިތުން ކުރި މިންނަތް މަސައްކަތުން ގިނަ ޕާޓީ އެކުލެވޭ ސިޔާސީ ނިޒާމާއި ޑިމޮކްރެޓިކް ގާނޫނުއަސާސީ އެއް ހާސިލުކުރެވި، ޑިމޮކްރެޓިކް ވެރިކަމެއް ފުރަތަމަ ފަހަރަށް 2008 ގައި ގާއިމުކުރެވުމަކީ ހޯދުނު ބޮޑު ކާމިޔާބީ އެއް ކަމަށެވެ. އަދި ޖަލުގައި ގައިދީންނަށް އަނިޔާކުރުމުގެ ސަގާފަތް ހުއްޓުވިފައިވުމީ ލިބުނު ކުރިއެރުމެއް ކަމަށް ޑިމޮކްރެޓްސް އިން ބުނެ އެވެ.
އެ ބަދަލުތަކާ އެކު ދެންވެސް ރައްޔިތުން އުއްމީދުކުރި، އަދި ގާނޫނުއަސާސީ ތަސައްވުރުކުރި ބޮޑެތި ބަދަލުތައް މިހާރު ފޮރޮޅިގެން ގޮސްފައިވާ ނުކިއްސަރު މަގާމެދު ކަންބޮޑުވާ ކަމަށް އެ ބަޔާނުގައި ބުނެފައިވެ އެވެ. އެގޮތުން ރައްޔިތުންގެ ހައްގުތަކާއި ބާރުގެ މައްޗަށް ނާޖާއިޒުގޮތުގައި ވެރިކަމުގެ ބާރު އިސްކުރަމުން ގެންދަނީ އެކިއިރު އެކިގޮތް ގޮތަށް ކަމަށް ބުނެފައިވެ އެވެ.
"ތަންފީޒީ ބާރުތައް ނޫނަސް، ދައުލަތުގެ ބާރުތަކުގެ ތެރޭގައި ހިމެނޭ މާލީ ބާރުވެރިކަމާއި އެއާއި ގުޅޭ ވަޒީފާތަކާއި މަސައްކަތްތަކާއި ހިދުމަތްތައްފަދަ ވަސީލަތްތައް ބޭނުންކޮށްގެން ރައްޔިތުން އޮބެހެއްޓުމާއި ހަންމަތަކުރުމުގެ ސަގާފަތް ދަނީ ފުޅާވަމުންނެވެ،" ބަޔާނުގައިވެ އެވެ.
ޑިމޮކްރެޓްސް އިން ވަނީ އެ ޕާޓީ ދެމި އޮންނާނީ އަނިޔާވެރިކަމާއި ދެކޮޅު އަދި ރައްޔިތުންގެ ހައްގުތައް ދިފާއުކޮށް ކުރިއެރުވުމުގެ ވިސްނުމާއި ފިކުރުގެ ބިންގާ މަތީގައި ކަމަށްވެސް ބުނެފަ އެވެ.