ގައުމު ކުރިއަށް ގެންދިޔުމުގެ ގާބިލުކަމެއް ސަރުކާރުގައި ނެތް ކަމަށް އެމްޑީޕީގެ ޗެއާޕާސަން ފައްޔާޒު އިސްމާއިލް ވިދާޅުވެއްޖެ އެވެ.
އެމްޑީޕީން ރޭ ކުރިއަށް ގެންދިޔަ ޕެނަލް ޑިސްކަޝަނެއްގައި ވާހަކަދައްކަމުން ފައްޔާޒު ވިދާޅުވީ މި ސަރުކާރުގައި ހާރިޖީ ސިޔާސަތެއް ނެތް ކަމަށާއި ފެންނަމުންދަނީ އެއްޗެއް ބޭނުންވުމުން އެ ދިމާލަކަށް ދާތަން ކަމަށެވެ. މި ސަރުކާރުގައި އެއްވެސް ކަހަލަ އިހުލާސްތެރި ކަމެއް ނެތް ކަމަށާއި ވައުދު ވުމުގައި ވެސް ހަދަނީ މުޅިން ވެސް ދޮގު ކަމަށް ފައްޔާޒު ވިދާޅުވި އެވެ.
އެގޮތުން ވަޒީފާތަކުން އެއްވެސް މީހަކު ވަކިނުކުރާނެ ކަމަށް ވައުދުވެވަޑައިގެންނެވި ނަމަވެސް އެކަމުގައި ވެސް އަމަލުކުރަމުންދަނީ ދިމާ އިދިކޮޅަށް ކަމަށާއި އަދި ފްލެޓުތަކުގެ މައްސަލާގައި ވެސް ކަންކަން ކުރަމުންދަނީ އެގޮތަށް ކަމަށް ފައްޔާޒު ވިދާޅުވި އެވެ. މި ސަރުކާރުގައި ހާރިޖީ ސިޔާސަތެއް ނެތުމުން އިތުރަށް އިގްތިސާދީ ސިޔާސަތެއް ވެސް ނެތް ކަމަށް އޭނާ ވިދާޅުވި އެވެ.
"ސަރުކާރުގެ އެއްވެސް ކަމެއްގައި އިހުލާސްތެރިކަމެއް ނެތްކަން މިއަދު މުޅި ދިވެހިރާއްޖެއަށް އެނގޭ. ގާބިލުކަމެއް ނެތް މި ގައުމު ކޮނޑުއަޅައިގެން ކުރިއަށް ދިޔުމުގެ. ވިދާޅުވި އައި އިރުގައި ތިމަންނަމެންނަށް ވާނެއޭ މެނޭޖުކުރަން އެނގެއޭ" ފައްޔާޒު ވިދާޅުވި އެވެ.
މީގެއިތުރުން ފައްޔާޒު ވަނީ ސަރުކާރުގެ އަމަލުތައް މިހާރު ހުރި ގޮތުން ގައުމު ފުނޑުފުނޑުވެ، އެތައް އަހަރަކަށް މި ގައުމު ފަހަތަށް ޖައްސާލަންދެން ރައްޔިތުން ބަލަން ތިބެދާނެތޯ ވެސް ސުވާލު އުފައްދާފަ އެވެ.