ޑާކް ރެއިން އެންޓައިންމަންޓުން ގެނެސްދޭން ތައްޔާރުވަމުން އަންނަ އެ ސްޓޫޑިއޯގެ ފުރަތަމަ ހޮރޯ-ކޮމެޑީ "ބިބީ" ގެ ފަސްޓްލުކް ޕޯސްޓަރު ދައްކާލައިފި އެވެ.
މިއީ އަލަށް ޑައިރެކްޝަނަށް ނުކުމެފައިވާ ޝަހުދާ މަހުމޫދު ލިޔެ، ޑައިރެކްޓްކޮށް ގެނެސްދޭ ފުރަތަމަ ފީޗާ ފިލްމެވެ.
"ބިބީ" ގެ ޝޫޓިން ނިންމާލައި، ފިލްމު މިހާރު ޕޯސްޓް-ޕްރޮޑަކްޝަން މަރުހަލާގައި އޮތް އިރު، ބެލުންތެރިންނަށް ފިލްމު ގެނެސްދޭން ހަމަޖެހިފައި ވަނީ އޮކްޓޯބަރު މަހުގެ 7 ގަ އެވެ.
"ބިބީ" ގެ ލީޑް ކާސްޓްގައި ހިމެނެނި ޝަހުދާގެ ފިރިމީހާ އަދި މިހާރު ބާރަށް ކުރިއަރަމުން އަންނަ ޒުވާން އެކްޓަރު ޝަރަފު އަބްދުﷲ އާއި މަރިޔަމް މަޖުދާ (މަޖޫ) އެވެ. ފިލްމުގެ އިތުރު ކާސްޓުންގެ ތެރޭގައި ޝީލާ ނަޖީބު، މަލީހާ ވަހީދު، ރަޒާން ރާމިޒު އަދި އަހުމަދު ސައީދު ފަދަ ފަންނާނުން ހިމެނެ އެވެ.
"ބިބީ" ގެ ވަރަށް ހާއްސަ ފެނިލުމަކުން ކުރީގެ މަޝްހޫރު އެކްޓަރު އިސްމާއީލް ވަޖީހު ވެސް ފެންނާނެ އެވެ.
މި ފިލްމަކީ ޑާކް ރެއިނުން މި އަހަރު އޮލިމްޕަސް ސްކްރީނަށް ގެންނަ ދެވަނަ ފިލްމެވެ. އެ ސްޓޫޑިއޯގެ މި އަހަރުގެ ފުރަތަމަ ފިލްމަކީ މާޗްގައި އެޅުވި ރިވެންޖް އެކްޝަން ތުރިލާ "ފުރޭތަ" އެވެ.