އަައްޑޫ ހިއްކި ބިމުގައި ހިދުމަތްތައް ގާއިމުކުރަން ފެށޭނީ ސީދާ ކޮންއިރަކުކަން ބުނަން ނޭންގޭކަމަށް ކޮންސްޓްރަކްޝަން އެންޑް އިންފްރާސްޓްރަކްޗާ މިނިސްޓަރު ޑރ. އަބްދުﷲ މުއްތަލިބް ވިދާޅުވެއްޖެއެވެ.
މިނިސްޓަރު މުއްތަލިބާ ސުވާލު ކުރުމަށް ލިބުނު ފުރުސަތުގައި މަރަދޫ ދާއިރާގެ މެންބަރު އަހުމަދުދީދީ ވަނީ މަރަދޫ ދާއިރާގައި މިހާރު ހިއްކާފައިވާ ބިމުގައި ފެނާއި ނަރުދަމާގެ ނިޒާމު ގާއިމުކުރަން ފަށަަން ގަސްދުކުރަނީ ކޮން އިރަކުންތޯ ސުވާލު ކޮށްފައިވެއެވެ.
އެ ސުވާލަށް ޖަވާބު ދެއްވަމުން މިނިސްޓަރު މުއްތަލިބް ވިދާޅުވީ 190 ހެކްޓަރުގެ ބިން ހިއްކާފައި އޮތްއިރު އެތަން ރައްޔިތުންނަށް ބޭނުންކުރެވޭނީ ފެނާ ނަރުދަމާ އަދި ކަރަންޓާއި މަގުތައް ހެދިގެން ކަމަށެވެ. އައްޑޫސިޓީ ކައުންސިލުން މިވަގުތު އެތަނުގެ ލޭންޑްޔޫޒް ޕްލޭން ހެދުމުގެ މަސައްކަތް ކުރަމުންދާކަން ފާހަގަކޮށް މިނިސްޓަރު މުއްތަލިބް ވިދާޅުވީ ލޭންޑްޔޫޒް ޕްލޭން ނިމުމުން އެތަނުގައި ފެނާ ނަރުދަމާ އަދި ކަރަންޓާއި މަގުތައް ހެދިގެން ކަންކަން ކުރިއަށް ގެންދަންޖެހޭނެ ގޮތް އެނގޭނެ ކަމަށެވެ.
މިނިސްޓަރު މުއްތަލިބް ވިދާޅުވީ ސަރުކާރުގެ ބަޖެޓަށް ފަސޭހަކަން ލިބިގެން ބޭރުގެ އެހީތެރިކަމާއެކުވެސް ކުރިއަށް ގެންދެވޭނަމަ އައްޑޫގެ ހިއްކި ސަރަހައްދަށް ބޭނުންވާ ހިދުމަތްތައް ފޯރުކޮށްދިނުމަކީ ސަރުކާރުން ވަރަށް ބޮޑަށް އިސްކަންދޭނެ ކަމެއް ކަމަށެވެ.
"މިވަގުތު އެއީ، ކުރިން ޕްލޭންކޮށްފައި އޮތް ކަމަކަށް ނުވާތީ، މިހާރު ބަޖެޓްގައިވެސް ހިމަނާފައިވާ ކަމަކަށް ނުވާތީ ސީދާ ދަންވަން ޔަގީނެއް ނޫން ކޮންއިރަކުން ކަމެއް ފެށޭނީ." މިނިސްޓަރު މުއްތަލިބް ވިދާޅުވިއެވެ.
އެހެންނަމަވެސް މިކަމަކީ އައްޑުގެ ތަރައްގީއަށް މުހިންމު ކަމެއްކަން ފާހަގަކޮށް މިނިސްޓަރު މުއްތަލިބް ވިދާޅުވީ ފުރުސަތު ލިބުނުހާ އަވަހަކަށް އެ މަސައްކަތް ކުރިއަށްގެންދާނެ ކަމަށެވެ.