އޮންލައިން ޕްލެޓްފޯމްތަކުގައި ސެލާ އެކައުންޓް ހުޅުވޭ ގޮތް ހަދައިދީ، އެފަދަ ޕްލެޓްފޯމްތައް މެދުވެރިކޮށް ޒުވާނުންނަށް ފައިސާ ލިބޭނެ ގޮތް ހަމަޖައްސައި ދިނުމަކީ އަމާޒެއް ކަމަށް ޔޫތު މިނިސްޓަރު އިބްރާހިމް ވަހީދު (އަސްވާޑު) ވިދާޅުވެއްޖެ އެވެ.
އިއްޔެ ފާހަގަކުރި ޒުވާނުންގެ ދުވަހާ ގުޅިގެން ދެއްވި ހިތާބުގައި މިނިސްޓަރު ވިދާޅުވީ ދުނިޔޭގައި މިހާރު ކުރިއަރަމުން އަންނަ އޮން-ޑިމާންޑް ވާކްފޯސް ނުވަތަ ފްރީލާންސިން މާކެޓްތަކަށް ދިވެހި ޒުވާނުންނަށް ފުރުސަތު ހުޅުވައި ދިނުމުގެ ގޮތުން އޮންލައިން ޕްލެޓްފޯމްތަކުގައި ސެލާ އެކައުންޓް ހުޅުވޭ ގޮތް ހަދައިދީ، އެ ޕްލެޓްފޯމްތައް މެދުވެރިކޮށް ޒުވާނުންނަށް އާމްދަނީ ހޯދޭނެ ގޮތް މަގުފަހި ކުރުމަކީ ކުރުން މުހިއްމު ކަމެއް ކަމަށެވެ.
"އަޅުގަނޑު އެދެނީ މި އަގުހުރި ވަގުތުގައި މި ފުރުސަތުތަކުގެ ބޭނުން ހިފުމަށް. މިގޮތުގައި ކުރިއަށް ދިއުމަށް ހިތްވަރުދީ އެހީތެރިވާ، އެންމެ ގާތުގައި ހުރި މަދަދުގާރެއް ގޮތުގައި އަޅުގަނޑު އަބަދުވެސް ހުންނާނަން." މިނިސްޓަރ ވިދާޅުވި އެވެ.
އަސްވާޑު ވިދާޅުވީ ރައީސް ޑރ. މުހައްމަދު މުއިއްޒުގެ ސަރުކާރުގެ މެނިފެސްޓޯގައި ޒުވާނުންނަށް ކަނޑައެޅިފައިވާ 32 ސިޔާސަތަކީ، ޒުވާނުންގެ ކުރިމަގު ކަނޑައަޅައިދޭ މަގުޗާޓެއް ކަމަށެވެ. އެހެންވެ އެ އަމާޒަށް ޒުވާނުންގެ ކަންކަމުގައި ސަރުކާރުން މަސައްކަތް ކުރާނެ ކަމަށް ވިދާޅުވި އެވެ.
މިނިސްޓަރު ވިދާޅުވީ، ޒުވާނުންނަށް ބޭނުންވާ ބޯހިޔާވަހިކަމާއި، ކުޅިވަރާއި ކަސްރަތުގެ ދާއިރާތަކުން ޒުވާނުން ތަމްރީނާއި ތައުލީމު ހާސިލުކޮށް، ރަނގަޅު އާމްދަނީއެއް ހޯދުމުގެ ފުރުސަތު ތަނަވަސްކޮށް ދިނުމަކީ ސަރުކާރުގެ ވަރަށް މުހިއްމު ސިޔާސަތުތަކެއް ކަމަށެވެ.
އަސްވާޑު ވިދާޅުވި ގޮތުގައި ޒަމާނީ އިންތިޒާމުތަކާއި ވަސީލަތްތައް އެކުލެވޭ ސަރަހައްދީ ފެންވަރުގެ ޕްރޮޑަކްޝަން ހައުސްއެއް ގާއިމުކުރުމާއި، ދިވެހި ޒުވާނުންގެ ޝައުގުވެރިކަމާއި ހުނަރު ހުރި ގިނަ ދާއިރާތަކެއް "ދިވެހިންނަށް ހާއްސަ" މަސައްކަތްތަކެއްގެ ގޮތުގައި އެކަށައަޅާ، އެ ދާއިރާތަކުގައި ދިވެހި ޒުވާނުންނާ ވާދަކޮށް ބިދޭސީން ހަރަކާތްތެރިވުން ހުއްޓުވުމަކީ ވެސް ޒުވާނުންނަށްޓަކައި ކުރަން ހުރި ކަންކަމެވެ.
"އަޅުގަނޑު އެދެނީ ދިވެހި ޒުވާނުންނަކީ އެމީހުންގެ ކަންކަން ހައްލުކުރެވޭ ބާރުވެރި، ކާމިޔާބު ބަޔަކު ކަމުގައި ވުމަށް. ޒުވާނުންގެ އުންމީދާއި، ހަކަތައާއި، ތޫނު ވިސްނުމުގެ ހެޔޮ ނަތީޖާއިން ދިވެހި ގައުމަށް އަދަ ށްވުރެ ފަހި އަބަށް ފެހި މުސްތަގުބަލެއް ހޯއްދަވައި ދެއްވުމަށް،" މިނިސްޓަރު ވިދާޅުވި އެވެ. "އަދުގެ ޒުވާނުންނަކީ މާދަމާ މިގައުމާ ހަވާލުވެ ގައުމު އެދޭގޮތަށް ގައުމާއިގެން ކުރިއަށް ދިއުމުގެ ގާބިލުކަން ލިބިފައިވާ ޒިންމާ އަދާކުރެވޭ ކާމިޔާބު ބަޔަކު ކަމުގައިވުން" މިނިސްޓަރ ވިދާޅުވިއެވެ.