އައްޑޫ މީދު އަށް ދިމާވެފައިވާ ރަށްގިރުމާއި ފެންބޮޑުވުމުގެ މައްސަލަ އަށް އަވަސް ހައްލެއް ހޯދުމަށްޓަކައި މަޝްވަރާކޮށްފި އެެވެ.
އެންވަޔަރަމަންޓް މިނިސްޓްރީގެ ނައިބު ޙައްސާން މުޙައްމަދު އިސްކޮށް ހުންނަވައިގެން އެ މަޝްވަރާ ކުރިއަށް ގެންދިޔައީ ކޮންސްޓްރަކްޝަން މިނިސްޓްރީގެ އިންޖިނިއަރިން ޓީމާ އެވެ.
އެ ބައްދަލުވުމުގައި މަޝްވަރާ ކުރެވުނީ މީދޫގެ ގޮނޑުދޮށް ހިމާޔަތްކުރުމަށް އަޅަންޖެހޭ ކުއްލި ފިޔަވަޅުތަކާ ބެހޭ ގޮތުންނެވެ.
މީދު އަކީ ފަހަކަށް އައިސް ރަށްގިރުމުގެ މައްސަލަ ވަރަށް ބޮޑަށް ކުރިމަތިވެފައިވާ ރަށެކެވެ. މީގެ އިތުރުން ފެންބޮޑުވުމުގެ މައްސަލަ ވެސް ދިމާވަމުންދާތީ، ރައްޔިތުންގެ ކަންބޮޑުވުން އިތުރުވެފައިވާ ކަމަށް އެންވަޔަރަމަންޓް މިނިސްޓްރީން ބުންޏެވެ.
އެހެންވެ މި މައްސަލަތަކަށް އަވަސް ހައްލެއް ހޯދުމަކީ ސަރުކާރުން ވަރަށް އިސްކަންދޭ ކަމެއް ކަމަށް ބުނެފައިވެ އެވެ.
އެންވަޔަރަމަންޓް މިނިސްޓްރީން ބުނީ ކޮންސްޓްރަކްޝް މިނިސްޓްރީއާ އެކީ ކުރެވުނު މަޝްވަރާތަކުގެ އަލީގައި މާ ލަސްތަކެއް ނުވެ މީދޫގެ ގޮނޑުދޮށް ހިމާޔަތްކުރުމަށް އަޅަން ޖެހޭ ފިޔަވަޅުތައް އަޅަން ފެށޭނެކަމުގެ އުންމީދު ބޮޑު ކަމަށެވެ.
މީދޫ ގޮނޑުދޮށް ހިމާޔަތްކުރުމުގެ މަޝްރޫއެއް އެމްޓީސީސީއާ ހަވާލުކޮށްގެން 2021 ގައި ހިންގާފައިވެ އެވެ.