ރަށްރަށުގައި ފެނަކައިން ކުރިއަށްގެންދާ ހުރިހާ މަޝްރޫއުއެއް އެމްޑަބްލިއުއެސްސީއާ ހަވާލުކުރުމަށް ނިންމާފައިވާ ކަމަށް ކޮންސްޓްރަކްޝަން އެންޑް އިންފްރާސްޓްރަކްޗާ މިނިސްޓަރު ޑރ. އަބްދުﷲ މުއްތަލިބް ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި މެންބަރުން ވަނީ ރާއްޖޭގެ ރަށްރަށުގައި ކުރިއަށްދާ މަޝްރޫއުތަކާ ގުޅޭގޮތުން މިނިސްޓަރާ ސުވާލު ކޮށްފައެވެ.
އެގޮތުންކުރި ސުވާލުތަކަށް ޖަވާބު ދެއްވަމުން މިނިސްޓަރު މުއްތަލިބް ވިދާޅުވީ، ފެނަކައަކީ ރަށްރަށުގައި ކުރިއަށް ގެންދާ އެކި މަޝްރޫއުތައް ކުރިއަށްގެންދާކަހަލަ ކޮންޓްރެކްޓަރެއް ނޫން ކަމަށެވެ. އަދި ފެނަކައަކީ ހިދުމަތް ފޯރުކޮށްދޭ ކުންފުންޏެއްކަން މިނިސްޓަރު ފާހަގަ ކުރެއްވިއެވެ.
މުއްތަލިބް ވިދާޅުވީ ފެނަކައާ ހަވާލު ކޮށްފައިހުރި ހުރިހާ މަޝްރޫއުތަކެއް ކޮންޓްރެކްޓު ބާތިލުކުރުމަށް ސަރުކާރުން ނިންމާފައިވަނީ ކަމަށެވެ. އަދި އެ މަޝްރޫއުތައް އެމްޑަބްލިއުއެސްސީއާ ވާހަކަ ދައްކައިގެން ޑައިރެކްޓު ނެގޯޝިއޭޝަނެއްގެ ތެރެއިން އެމްޑައިބްލިއުއެސްސީއާ ހަވާލު ކޮށްގެން ކުރިއަށް ގެންދަން ނިންމާފައިވާ ކަމަށްވެސް ވިދާޅުވިއެވެ.
ފެނަކައާ ހަވާލުކޮށްގެން 20 ރަށެއްގައި ކުރިއަށް ގެންދާ އެކި މަޝްރޫއުތައް އެމްޑަބްލިއުއެސްސީއާ ހަވާލުކުރަން ނިންމާފައިވާކަމަށާއި މިމަސް ނިމުމުގެ ކުރިން އެ މަޝްރޫއުތައް ހަވާލު ކުރެވޭތޯ މަސައްކަތް ކުރަމުންދާ ކަމަށް މިނިސްޓަރު މުއްތަލިބް ވިދާޅުވިއެވެ.
މީގެއިތުރުން ވިދާޅުވީ އެއްވެސް ރަށެއްގެ ފެނާއި ނަރުދަމާގެ އެއްވެސް މަޝްރޫއެއް މަޑުޖައްސާލާފައި ނުބާއްވާނެ ކަމަށާއި އެފަދަ މަޝްރޫއުތައް ވީހާވެސް އަވަހަކަށް ފަށައި ރައްޔިތުންނަށް ހިދުމަތް ފޯރުކޮށްދެއްވާނެ ކަމަށެވެ.