މިހާރު ރާއްޖޭގެ ހުރިހާ ސަރަހައްދެއްގެ ކަނޑުތައް ވެސް ގަދަވެފައިވާތީ ދިޔަވަރު ބޮޑުވާ ވަގުތުތަކުގައި އުދަ އެރުން އެކަށީގެންވާ ކަމަށް މޫސުމާ ބެހޭ އިދާރާ އިން ބުނެފި އެވެ.
އެތަނުން މިއަދު ބުނީ ވިލާގަނޑުގައި ގަޑިއަކު 60 މޭލަށް ވައި ގަދަވުމުގެ ފުރުސަތު ވެސް ބޮޑު ކަމަށެވެ. އެހެންވެ މިއީ މުޅި ރާއްޖެ އަށް ވެސް މޫސުން ގޯސް ދުވަސްވަރެއްކަމުން މޫސުމަށް ސަމާލުވުމަށާއި ކަނޑު ދަތުރުކުރާ ފަރާތްތަކުން ވެސް ހާއްސަ ސަމާލުކަމެއް ދިމުމަށް މެޓް އޮފީހުން އިލްތިމާސްކޮށްފައިވެ އެވެ.
އެތަނުން ބުނީ ކުރިއަށް އޮތް 5 ދުވަހު ވެސް ރާއްޖޭގެ ބޮޑު ބަޔަކަށް ގުގުރުމާ އެކީ ވިއްސާރަކުރާނެ ކަމަށެވެ. އަދި މިހާރު ވެސް ކ. އަތޮޅުން ފެށިގެން އައްޑުއާ ހަމައަށް ބޯކޮށް ވާރޭ ވެހޭނެ ކަމަށް ލަފާކޮށް މެންދުރު 12:30 އާ ހަމައަށް އޮތީ ވައިޓް އެލާޓް ނެރެފަ އެވެ.
ފާއިތުވި 24 ގަޑިއިރު ވާރޭ ވެހުނު މިންވަރަށް ބަލާ އިރު، އެންމެ ބޯކޮށް ވާރޭ ވެހިފައި ވަނީ ހއ. ކެލައަށެވެ. އެތަނަށް 231.3 މިލިމީޓަރުގެ ވާރޭ ވެހިފައިވެ އެވެ. މެޓް އޮފީހުން އެ މިންވަރަކީ އޮޓޮމެޓިކް ވެދަ ސްޓޭޝަނަކުން 24 ގަޑިއިރަށް ރެކޯޑް ކުރެވު އެންމެ މަތީ އަދަދު ކަމަށެވެ.
ބޯކޮށް ވާރޭ ވެހި ފެންބޮޑުވެގެންނާއި ވައި ގަދަވުމުގެ ސަބަބުން ގެއްލުންވެގެން އިއްޔެ ވެސް 9 ރަށަކުން ރިޕޯޓްކޮށްފައިވެ އެވެ. އެހެންވެ ނެޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން އަންނަނީ ރައްކާތެރިކަމުގެ ފިޔަވަޅުތައް އެޅުމަށް އިރުޝާދު ވެސް ދެމުންނެވެ.