ބޮލީވުޑްގެ އެކްޓަރު ބޮބީ ޑިއޯލްގެ ފުރަތަމަ ތަމަޅަ ފިލްމު "ކަންގޫވާ" ގެ ޓްރެއިލާ ދައްކާލައިފި އެވެ.
ބެލުންތެރިން މުޅިން ތަފާތު ޒަމާނަކަށް ގެންގޮސްދޭނެ މި ފިލްމުގައި ކާމިޔާބު އެތައް ފިލްމެއް ކުޅެފައިވާ އެކްޓަރު ކުޅެފައި ވަނީ އޭނަ ވަރަށް ތަފާތު ވެސްކޮށް ފެންނާނެ ރޯލެކެވެ. އަދި މިއީ މިދިޔަ އަހަރުގެ "އެނިމަލް" އަށް ފަހު އަނެއްކާ ވެސް ބޮބީ ނެގަޓިވް ރޯލުން ފެންނާނެ ފިލްމެކެވެ. އޭނަގެ ކެރެކްޓާގެ ނަމަކީ އުދިރަން އެވެ.
އޮކްޓޯބަރު 10 ގައި ސިނަމާތަކަށް ގެންނަން ހަމަޖެހިފައިވާ "ކަންގޫވާ" އަކީ ކުޅަދާނަ ތަމަޅަ ޑައިރެކްޓަރު ސިވާ ހަދާފައިވާ ފެންޓަސީ އެކްޝަން-އެޑްވެންޗާއެކެވެ.
މީގެ ލީޑް ތަރިއަކީ ނެޝަނަލް އެވޯޑް ވެސް ހޯދާފައިވާ ދެކުނުގެ މަޝްހޫރު ތަރި ސޫރިއާ އެވެ.
"ކަންގޫވާ" ގެ ކާސްޓްގައި ޑިޝާ ޕަޓާނީ، ނަތުރަޖަން ސުބްރަމާނިއަމް، ޔޯގީ ބާބޫ، ޖަގަޕަތީ ބާބޫ އަދި ކޮވައިލާ ސަރްލާ ފަދަ ތަރިން ހިމެނެ އެވެ.
ތަމަޅަ ފިލްމަކުން ބޮބީ ބެލުންތެރިންނާ ބައްދަލު ކުރަން ތައްޔާރުވަމުން އަންނަ އިރު، އޭނަ އަންނަނީ ތެލެގޫ ދެ ފިލްމެއްގައި ވެސް މަސައްކަތް ކުރަމުންނެވެ. އެއީ "ހަރީ ހަރާ ވީރަ މައްލޫ" ގެ އިތުރުން ނަންދަމުރީ ބާލަކްރިޝްނާއާ އެކީ ކުޅޭ ފިލްމެކެވެ.