ވެރިކަމުން ދުރުކުރަން އެމެރިކާ އިން ވަރަށް ބޮޑު ރޯލެއް އަދާކޮށްފައިވާ ކަމަށް ވިދާޅުވެ، ބަންގްލަދޭޝްގެ ކުރީގެ ބޮޑުވަޒީރު ޝޭހް ހަސީނާ ދެއްކެވި ވާހަކަތަކަށް އެމެރިކާ އިން ރައްދު ދީފި އެވެ.
ހަސީނާއާ ދެކޮޅަށް ބޮޑެތި މުޒާހަރާތަކެއް ފަށައި، ގައުމު ވަރަށް ބޮޑަށް ހަލަބޮލިވެފައި ވަނިކޮށް، މިދިޔަ ހަފުތާގެ ތެރޭގައިއިސްތިއުފާ ދެއްވައި، އޭނަ ވަނީ ފިއްލައިވައިގެން އަވައްޓެރި އިންޑިއާ އަށް ވަޑައިގެންފަ އެވެ.
ހަސީނާއާ ހަވާލާދީ އިންޑިއާގެ އިކޮނިމިކް ޓައިމްސް އިން ބުނީ އެ ކަމަނާގެ ވެރިކަން ވައްޓައިލަން އެމެރިކާ އިން ނުފޫޒު ފޯރުވަމުން ގެންގޮސްފައިވާ ކަމަށެވެ. އެގޮތުން އެ ގައުމުގެ ގާނޫނު ހަދާ މަޖިލީހުގެ ތެރެއިން ވެސް އެކަން ކުރަން އެމެރިކާ އިން މަސައްކަތްތަކެއްކޮށްފައިވާ ކަމަށް ތުހުމަތު ކުރައްވާފައިވެ އެވެ.
ހަސީނާ ވިދާޅުވި ގޮތުގައި އެ ކަމަނާ ވެރިކަމުން ދުރުކުރަން އެމެރިކާ އެންމެ ބޮޑަށް ބޭނުންވި ސަބަބަކީ ބޭ އޮފް ބެންގާލްގެ ރަށެއް ކަމަށްވާ ސައިންޓް މާޓިންގެ ކޮންޓްރޯލް ނެގުމަށެވެ.
ހަސީނާ ދެއްކެވި ވާހަކަތަކާ ގުޅިގެން ވައިޓް ހައުސްގެ ތަރުޖަމާނު ކެރީން ޖިއާން-ޕިއާ ވިދާޅުވީ ހަސީނާގެ ވެރިކަން ވެއްޓުމާ އެމެރިކާއާ އެއްވެސް ގުޅުމެއް ނެތް ކަމަށެވެ.
"އެހެންވީ އެކަމުގައި އެމެރިކާގެ ބައިވެރިވުމެއް އޮތް ކަމަށް ބުނާ ވާހަކަތަކުގައި އެއްވެސް އަސާސެއް ނެތް،" އޭނަ ވިދާޅުވި އެވެ. "އަހަރެމެން އެދެނީ ބަންގްލަދޭޝްގެ މުސްތަގުބަލަށްޓަކައި ރަނގަޅު ގޮތްތަކެއްވާ ތަން ދެކެން."
ހަސީނާ އިސްތިއުފާ ދެއްވުމާ ގުޅިގެން ބަންގްލަދޭޝްގައި މިހާރު ވަނީ ވަގުތީ ސަރުކާރެއް އެކުލަވާލައިފަ އެވެ. އެ ސަރުކާރުގެ ވެރިޔަކީ މުހައްމަދު ޔޫނުސް އެވެ.