މަސްތުވާތަކެތި ބޭނުންކުރުމުގެ މައްސަލައެއްގައި ހައްޔަރު ކުރި މީހަކު ތަހުގީގަށް ކުޑަކަމުދާތަކެތި ދިނުމަށް އިންކާރު ކުރި މައްސަލައެއްގައި އެއް އަހަރަށް ޖަލަށް ލާން ކްރިމިނަލް ކޯޓުން ހުކުމްކޮށްފި އެވެ.
އެ ހުކުމް އިއްޔެ އިއްވީ އައްޑޫ ހިތަދޫ، ޔެލޯވިލާ އަދުނާނު، 54، ގެ މައްޗަށެވެ.
އޭނަގެ މައްޗަށް ހުކުމް އިއްވި އިރު ދައުވާއަށް އިންކާރުކޮށްފައިވެ އެވެ. އަދި ކުޑަކަމުދާތަކެތި ދޭން ފުލުހުން އެދިފައި ނުވާ ކަމަށާއި އެކަން އޭނާ އަށް އަންގާފައި ވެސް ނުވާ ކަމަށް ކޯޓުގައި އަދުނާން ބުނެފައިވެ އެވެ.
އެ މައްސަލައިގައި ދައުލަތުން ހުށައެޅި ދައުވާ ސާބިތުކުރުމަށް ހަ ފުލުހެއްގެ ހެކިބަހަށް ރިއާޔަތްކޮށްފައިވެ އެވެ. އެގޮތުން އޭގެ ތެރެއިން ދެ ފުލުހަކު ވަނީ އަދުނާން ފުލުހުންގެ ބެލުމުގެ ދަށަށް ގެނެވުނުކަން ސާބިތުކުރުމަށް ހެކި ދީފަ އެވެ. އަދި އަނެއް ހަތަރު ފުލުހުންނަކީ އޭނަ ކުޑަކަމުދާތަކެތި ނުދީފައިވާ ކަން ސާބިތުކުރުމަށް ހެކި ދިން މީހުންނެވެ.