ޕްރޮސިކިއުޓާ ޖެނެރަލް (ޕީޖީ) ހުސެއިން ޝަމީމް މަގާމުން ވަކިކުރަން ރައްޔިތުންގެ މަޖިލީހުގެ ޖުޑިޝަރީ ކޮމިޓީއަށް މިއަދު ހުށަހަޅައިފިއެވެ.
ރައްޔިތުންގެ މަޖިލީހުގެ ޖުޑިޝަރީ ކޮމިޓީއަށް މި މައްސަލަ ހުށަހެޅީ ޕީއެންސީއަށް ނިސްބަތްވާ ހުޅުދޫ ދާއިރާގެ މެންބަރު މުހައްމަދު ޝާހިދުއެވެ.
އެގޮތުން ޕްރޮސިކިއުޓާ ޖެނެރަލްގެ މަގާމުން ޝަމީމް ވަކިކުރަންޖެހޭ 8 ސަބަބެއް ޝާހިދު ހުށަހެޅި މައްސަލައިގައި ފާހަގަ ކޮށްފައިވެއެވެ. ޖުޑިޝަރީ ކޮމިޓީގެ މިއަދުގެ ބައްދަލުވުމުގައި ވަނީ އިތުބާރު ނެތްކަމުގެ މައްސަލަ ފަށަން ކޮމިޓީގެ މެންބަރުންގެ ވަނީ ފާސްކޮށްފައެވެ.
ޕީޖީ ޝަމީމް ވަކިކުރަން ހުށަހެޅި ސަބަބުތަކުގެ ތެރޭގައި ރޭޕްގެ ދައުވާ ލިބުނު ކުރީގެ ޓޫރިޒަމް މިނިސްޓަރު އަލީ ވަހީދަށް ކުރި ދައުވާ ފައިލް ކުރަން ނިންމުމާއި، ކުރީގެ ޔޫތް މިނިސްޓަރު އަހުމަދު މަހުލޫފްގެ މައްސަލަ ފައިލް ކުރުމަށް ނިންމުމާއި، ސަފާރީ ރޭޕް ކޭސްގެ މައްސަލައިގައި ދަށުކޯޓުގެ ނިންމުން އިސްތިއުނާފު ނުކުރަން ނިންމުން، މިލަންދޫ ދާއިރާގެ ކުރީގެ މެންބަރު އަލީ ރިޒާގެ މައްޗަށް އުފުލި ހިއުމަން ޓްރެފިކިންގެ ދައުވާ އަނބުރާ ގެނައުން، އަލަމްގީރު މައްސަލައިގައި ބައެއް މީހުންގެ މައްޗަށް ދައުވާ ނުކޮށް ފައިލް ކުރުން އަދި ވެންޓިލޭޓަރުގެ މައްސަލައިގައި މީހުންގެ މައްޗަށް ދައުވާ ނުކުރުމަށް ނިންމުން ހިމެނެއެވެ.
މަޖިލީހުގެ ގަވައިދު މިހާރު އޮންނަ ގޮތުން މިގޮތަށް މަގާމުން ވަކިކުރުމަށް ހުށަހެޅޭ މައްސަލަތައް ފުރަތަމަ ކޮމިޓީއަށް ހުށަހަޅައި، ކޮމިޓީން ފާސްކޮށް ރިޔާސަތަށް ހުށަހެޅުމުން އެ މައްސަލަ ރިޔާސަތުން އިއުލާނު ކުރާނެއެވެ. އަދި އެ މައްސަލަ ކުރިއަށް ގެންދިއުމާމެދު މަޖިލީހުގެ ތަޅުމުން ފާސްކުރުމުން އެ މައްސަލަ އަނެއްކާވެސް ކޮމިޓީއަށް ހުށަހަޅައިގެން ކުރިއަށްގެންދާނެއެވެ. ކޮމިޓީގައި މައްސަލަ ކުރިއަށްދާއިރު އެ ފަރާތަކަށް ޖަވާބުދާރީ ވުމުގެ ފުރުސަތު ކޮމިޓީން ދޭނެއެވެ.