މި އަހަރުގެ އޮލިމްޕިކްސް ފެށުމުގެ ރަސްމިއްޔާތުގައި ބައިވެރިވެވަޑައިގަތުމަށް ނައިބު ރައީސް ހުސެއިން މުހައްމަދު ލަތީފު ފްރާންސްގެ ވެރިރަށް ޕެރިހަށް ކުރެއްވި ދަތުރުފުޅަށް 1.3 މިލިއަން ރުފިޔާ ހަރަދުވެއްޖެ އެވެ.
ރައީސް އޮފީހުން މިއަދު ވަނީ ނައިބު ރައީސް ޕެރިހަށް ކުރެއްވި ދަތުރުފުޅާއި އަދި އިރާނުގެ ރައީސްގެ ހުވާ ކުރެއްވުމުގެ ރަސްމިއްޔާތުގައި ބައިވެރިވެވަޑައިގަތުމަށް އެގައުމަށް ކުރެއްވި ދަތުރުފުޅުގެ ހަރަދު ތަފްސީލު ހާމަކޮށްފަ އެވެ.
ރައީސް އޮފީހުން ބުނިގޮތުގައި ނައިބު ރައީސް ޕެރިހަށް ކުރެއްވި ދަތުރުފުޅަށް ވަނީ 1،344،127.04ރ. ހަރަދުވެފަ އެވެ. ނައިބު ރައީސް އިރާނަށް ކުރެއްވި ދަތުރުފުޅަށް ހަރަދުވެފައިވަނީ 464،617.43ރ. އެވެ.
ނައިބު ރައީސް ޕެރިހަށް ވަޑައިގެންނެވުމުގައި މުހިއްމު ތިން ސަބަބެއް ހިމެނޭ ކަމަށާއި އެއީ އޮލިމްޕިކްސް އަކީ ދުނިޔޭގެ އެންމެ ބޮޑު ކުޅިވަރު މުބާރާތަށް ވެފައި، ޕެރިހުގައި ބޭއްވި މި މުބާރާތަކީ ފުރަތަމަ ފަހަރަށް ދިވެހި އެތްލީޓަކު ކޮލިފައިވެގެން ކުޅުނު ފުރަތަމަ މުބާރާތަށްވުމާއި، ފްރާންސަކީ ކުޅިވަރުގައި ފުންނާބު އުސް އެއް ގައުމަށް ވެފައި، ކުޅިވަރުގެ ދާއިރާ އިން ދިވެހި އެތްލީޓުންނާއި ދިވެހި ކުޅިވަރުގެ ވަސީލަތްތައް ތަރައްގީ ކުރުމުގައި ގެންގުޅޭނެ އައު ގޮތްތައް ދެނެގަނެ، ފުރުސަތުތައް ހޯދުމަށް މަޝްވަރާ ކުރެވުނު ކަމަށް ރައީސް އޮފީހުން ބުނެ އެވެ.
މީގެއިތުރުން އޮލިމްޕިކްސް ފަދަ މަގުބޫލު ކުޅިވަރު މުބާރާތެއްގެ ތެރެއިން ރާއްޖެ އާއި ސްޕޯޓްސް ޓޫރިޒަމްގެ ރޮނގުން ރާއްޖެ ދުނިޔޭގެ ލީޑަރުންނާއި އެތްލީޓުންނަށް ތައާރަފް ކުރުމަކީ ވެސް މި ދަތުރުފުޅުގެ މުހިއްމު ސަބަބެއް ކަމަށް ރައީސް އޮފީހުން ހާމަކުރެ އެވެ.